୧୨ରେ ସମୀକ୍ଷା ବୈଠକ
ଘନ ଘନ ବିଦୁ୍ୟତ କାଟ୍ ପ୍ରସଙ୍ଗ
ପାୱାର କଟ୍ କେଉଁଠି ବି ହେଉନି: ଶକ୍ତିମନ୍ତ୍ରୀ
ଭୁବନେଶ୍ୱର,୧୦ା୬(ବୁ୍ୟରୋ): ରାଜ୍ୟରେ ଘନଘନ ବିଦୁ୍ୟତ୍ କାଟ୍ ନେଇ ବିଭିନ୍ନ ମହଲରେ ଅସନ୍ତୋଷ ତେଜିବାରେ ଲାଗିଛି । ଏପରିକି ବିଗତ ଦିନରେ ରାଜଧାନୀରେ ଦୀର୍ଘ ସମୟ ଧରି ବିଜୁଳି ବିଚ୍ଛିନ୍ନ ହୋଇଥିବା ଘଟଣାରେ ମୁଖ୍ୟ ଶାସନ ସଚିବ ପ୍ରଦୀପ ଜେନା ଟ୍ୱିଟ୍ କରି ଅସନ୍ତୋଷ ଜାହିର କରିଥିଲେ । ବାରମ୍ବାର ବିଦୁ୍ୟତ୍ କାଟ୍ ଜନିତ ସମସ୍ୟାକୁ ନେଇ ମୁଖ୍ୟ ଶାସନ ସଚିବ ଆସନ୍ତା ଜୁନ୍ ୧୨ ତାରିଖରେ ଏକ ସମୀକ୍ଷା ବୈଠକ ଡକାଇଛନ୍ତି । ଲୋକସେବା ଭବନରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିବାକୁ ଥିବା ଏହି ବୈଠକରେ ରାଜ୍ୟର ୪ଟି ବିଦୁ୍ୟତ୍ ବିତରଣ କମ୍ପାନୀର ସିଇଓ ଯୋଗ ଦେବ ବୋଲି ଜଣାପଡିଛି ।
ଅପରପକ୍ଷରେ ରାଜ୍ୟରେ ପାୱାର କଟ୍ କେଉଁଠି ବି ହେଉନି ବୋଲି ଦୋହରାଇଛନ୍ତି ଶକ୍ତିମନ୍ତ୍ରୀ ପ୍ରତାପ ଦେବ । ସେ କହିଛନ୍ତି, ପବନ ହେଲେ ବିଦ୍ୟୁତ୍ କାଟିବାକୁ ବାଧ୍ୟ । କାରଣ କାଳବୈଶାଖୀରେ ବହୁତ ସ୍ଥାନରେ ଖୁଣ୍ଟ ଉପୁଡ଼ି ଯାଉଛି । ପୁଣି ଖୁଣ୍ଟ ପୋତି ତାର ଲଗାଇବା ସମୟସାପେକ୍ଷ । ଆଖି ପିଛୁଳାକେ ସେ କାମ ହୋଇ ପାରିବନି । ଉପଭୋକ୍ତା ଯେପରି ହାରରେ ବିଦ୍ୟୁତ ବ୍ୟବହାର କରୁଛନ୍ତି, ଭିତ୍ତିଭୂମି ସେପରି ଲୋଡ୍ ସମ୍ଭାଳିବାର ଅଛି । ଯେଉଁଥିପାଇଁ ଅନେକ ସ୍ଥାନରେ ତାର କି ଟ୍ରାନ୍ସଫର୍ମର ପୋଡ଼ି ଯାଉଛି । ଏହା ରାଜ୍ୟ ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ । ବିଦୁ୍ୟତ କାଟ୍ ପ୍ରସଙ୍ଗରେ ଗଣାମାଧ୍ୟମର ପ୍ରଶ୍ନରେ ଶକ୍ତି ମନ୍ତ୍ରୀ ପ୍ରତାପ ଦେବ ଏଭଳି ଉତ୍ତର ରଖିଛନ୍ତି ।
ଏସମ୍ପର୍କରେ ସୂଚନା ଦେଇ ଶକ୍ତି ମନ୍ତ୍ରୀ ଶ୍ରୀ ଦେବ କହିଛନ୍ତି ଯେ, ଭିତ୍ତିଭୂମି ଅସୁବିଧା ଓ ଅଭାବ ଯୋଗୁଁ ଯେଉଁଠି ବିଦ୍ୟୁତ କାଟ ଦୁଇରୁ ତିନି ଘଣ୍ଟା ପାଇଁ ହେଉଛି, ସେଠି ପାୱାର ଅଭାବ କି ରାଜ୍ୟ ସରକାର ବିଦ୍ୟୁତ ଯୋଗାଇ ପାରୁ ନାହାନ୍ତି ଏ ଶବ୍ଦ କହିବା ଭୁଲ । ରାଜ୍ୟ ସରକାରଙ୍କ କାମ ହେଉଛି ବିଦ୍ୟୁତ ବିତରଣ କମ୍ପାନୀକୁ ତାଗିଦ କରି ବିଦ୍ୟୁତ ଯୋଗାଇବା । ରାଜ୍ୟ ସରକାର ସେଥିରେ ତତ୍ପର ଅଛନ୍ତି । କାଳବୈଶାଖୀରେ ଯାହା ଭାଙ୍ଗିବ ସରକାର ତାକୁ ଶୀଘ୍ର ଠିକ୍ କରିବାକୁ ପଦକ୍ଷେପ ନେବାରେ ହେଳା କରୁନାହାନ୍ତି ବୋଲି ଶକ୍ତିମନ୍ତ୍ରୀ ଶ୍ରୀ ଦେବ ତାଙ୍କ ପ୍ରତିକ୍ରୀୟାରେ ପ୍ରକାଶ କରିଛନ୍ତି ।
About Author
