ଛାତ ଉପରେ ପଡ଼ିଲା ମିଗ୍-୨୧, ୩ ମୃତ
ଜୟପୁର(ଏଜେନ୍ସି): ରାଜସ୍ଥାନର ହନୁମାନଗଡ଼ରେ ବାୟୁସେନାର ଏକ ମିଗ୍-୨୧ ବିମାନ ଦୁର୍ଘଟଣାଗ୍ରସ୍ତ ହୋଇ ଛାତ ଉପରେ ଖସି ପଡ଼ିବାରୁ ୨ ମହିଳାଙ୍କ ସମେତ ୩ଜଣ ପ୍ରାଣ ହରାଇଛନ୍ତି ।
ସୋମବାର ପୂର୍ବାହ୍ନ ୯.୪୫ରେ ମିଗ୍-୨୧ ଫାଇଟର ଜେଟ୍ ଦୁର୍ଘଟଣାଗ୍ରସ୍ତ ହୋଇ ବହଲୋଲ ନଗର ଗାଁର ଜଣେ ବ୍ୟକ୍ତିଙ୍କ ଛାତ ଉପରେ ଖସି ପଡ଼ିଥିଲା । ଦୁର୍ଘଟଣାରେ ପାଇଲଟ ଆହତ ହୋଇଛନ୍ତି । ବାୟୁସେନା ଅଧିକାରୀଙ୍କ ସୂଚନା ଅନୁଯାୟୀ, ଉକ୍ତ ଜେଟ୍ ସୁରତଗଡ଼ରୁ ଉଡ଼ିଥିଲା ଓ ବହଲୋଲ ନଗର ଉପରେ ଛାତ ଉପରେ ଖସିପଡ଼ିଥିଲା । ଉକ୍ତ ଘର ଧ୍ୱଂସ ହୋଇଯାଇଥିବା ବେଳେ ବିମାନ ମଧ୍ୟ ଖଣ୍ଡଖଣ୍ଡ ହୋଇଯାଇଛି । ଦୁର୍ଘଟଣାସ୍ଥଳରେ ଲୀଲା ଦେବୀ, ବନ୍ଶୋ କୌର ଏବଂ ହସ୍ପିଟାଲରେ ରତନ ସିଂହଙ୍କ ମୃତୁ୍ୟ ଘଟିଛି । ବିମାନରେ ଯାନ୍ତ୍ରିକ ତ୍ରୁଟି ଦେଖାଯିବା କ୍ଷଣି ପାଇଲଟ ତାହାକୁ ଗାଁଠୁ ଦୂରକୁ ନେବାକୁ ଯଥାସମ୍ଭବ ଉଦ୍ୟମ କରିଥିଲେ । ମାତ୍ର ଗାଁ ଅତିକ୍ରମ କରିବା ବେଳେ ଏହା ଖସି ପଡ଼ିଥିଲା । ପାଇଲଟ ପାରାଶୁଟ ସାହାଯ୍ୟରେ ତଳକୁ ଖସି ଥିବା ବାୟୁସେନା ପକ୍ଷରୁ କୁହାଯାଇଛି । ଦୁର୍ଘଟଣାର କାରଣ ଅନୁଧ୍ୟାନ ପାଇଁ କମିଟି ଗଠିତ ହୋଇଥିବା ବାୟୁସେନା ଅଧିକାରୀ କହିଛନ୍ତି ।
About Author
