ହାତୀ ଆକ୍ରମଣରେ ଶିଶୁକନ୍ୟା ମୃତ
ଢେଙ୍କିକୋଟ, ୨୮ା୪ (ଆପ୍ର): ହାତୀ ଆକ୍ରମଣରେ ଏକ ପରିବାରର ଜଣଙ୍କ ଜୀବନ ଯାଇଥିବା ବେଳେ ୩ ଜଣ ଗୁରୁତର ହୋଇ ଚିକିତ୍ସିତ ହେଉଛନ୍ତି । ଏଭଳି ଘଟଣା ଘଟିଛି କେନ୍ଦୁଝର ଜିଲ୍ଲା ଘଟଗାଁ ରେଞ୍ଜ ଢେଙ୍କିକୋଟ ସେକ୍ସନ ଅନ୍ତର୍ଗତ ସାନ୍ତରାପୁର ପଞ୍ଚାୟତର ମେଣ୍ଢାମୁଣ୍ଡି ସାହିରେ ।
ଗୁରୁବାର ରାତିରେ ଏକ ଦନ୍ତାହାତୀ ଗ୍ରାମରେ ପଶି ଡକ ମୁଣ୍ଡା ଘରକୁ ସମ୍ପୂର୍ଣ୍ଣ ଭାଙ୍ଗି ଦେଇଥିଲା । ଘରେ ଡକ ମୁଣ୍ଡା, ସ୍ତ୍ରୀ ରସ୍ମିତା ମୁଣ୍ଡା(୨୫), ବଡ଼ଝିଅ ସୋନାଲି ମୁଣ୍ଡା(୬) ଓ ବର୍ଷକ ଶିଶୁକନ୍ୟା ମାନସୀ ଶୋଇଥିବା ବେଳେ ଦୁର୍ଭାଗ୍ୟକୁ ସମସ୍ତେ ମାଟିକାନ୍ଥ ତଳେ ଚାପି ହୋଇ ଯାଇଥିଲେ । ଖବର ପାଇ ଗ୍ରାମବାସୀ ସମସ୍ତଙ୍କୁ କାନ୍ଥ ତଳୁ ଉଦ୍ଧାର କରି କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ । ସେଠାରେ ଚିକିତ୍ସିତ ଅବସ୍ଥାରେ ଶିଶୁକନ୍ୟାର ମୃତୁ୍ୟ ହୋଇଥିବା ବେଳେ ଅନ୍ୟ ତିନିଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ସୂଚନାଯୋଗ୍ୟ ଯେ ଏହି ଦନ୍ତାହାତୀଟି ଦୁଇଦିନ ପୂର୍ବରୁ ରଘୁବେଡ଼ା ନିକଟବର୍ତ୍ତୀ ବୈଠାଟାଙ୍ଗର ନିକଟରେ ଥିବା ଅଲେଖ ମହିମା ମଠ ଭାଙ୍ଗିବା ସହିତ ମଠରେ ଥିବା ଖାଦ୍ୟ ସାମଗ୍ରୀ ନଷ୍ଟ କରି ଦେଇଥିଲା । ସେହିପରି କିଛିଦିନ ତଳେ ମସିଣାବିଲା, ଭୋଳବେଡ଼ା, ନୂଆଗାଁ ଗ୍ରାମରେ ଉକ୍ତ ହାତୀଟି ଉତ୍ପାତ କରି ଅନେକ କ୍ଷୟକ୍ଷତି କରିଥିଲା । ଏହି ଦନ୍ତାହାତୀ ପାଗଳ ପରି ଏ ଗାଁ ସେ ଗାଁ ହୋଇ ଲୋକଙ୍କ ଆଖିରୁ ନିଦ ହଜେଇ ଦେଇଛି । ଉକ୍ତ ଦନ୍ତାକୁ ଅଟେଇ ସଂରକ୍ଷିତ ଜଙ୍ଗଲରେ ଛାଡ଼ିବାକୁ ସାଧାରଣରେ ଦାବି ହେଉଛି ।
About Author
