ଜଣେ ମୃତ, ୩ ନିଖୋଜ
କୋଲାବରେ ବୁଡିଲା ଡଙ୍ଗା
କୋରାପୁଟ, ୧୩ା୪(ଆପ୍ର): କୋଲାବ ଜଳଭଣ୍ଡାରରେ ଗୁରୁବାର ଅପରାହ୍ଣରେ ଡଙ୍ଗା ବୁଡି ଜଣେ ପ୍ରାଣ ହରାଇଥିବା ବେଳେ ୩ ଜଣ ନିଖୋଜ ଅଛନ୍ତି । କୋରାପୁଟ ଜିଲ୍ଲା ସେମିଳିଗୁଡା ବ୍ଲକ ପୋଡ଼ଗଡ଼ ଘାଟରେ ଘଟିଛି ଏହି ଦୁର୍ଘଟଣା । ଗୋଟିଏ ଦେଶୀଡଙ୍ଗା ଭାରସାମ୍ୟ ହରାଇ ବୁଡ଼ିଯାଇଛି ।
ତେନ୍ତୁଳିପଡ଼ାରୁ ପୋଡ଼ଗଡକୁ ଦେଶୀ ଡଙ୍ଗାରେ ଯାଉଥିଲେ ୮ ଜଣ । ସେମାନଙ୍କ ମଧ୍ୟରୁ ୪ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ ୩ ଜଣ ମହିଳା ଓ ଜଣେ ଶିଶୁ ସମେତ ମୋଟ ୪ ଜଣ ନିଖୋଜ ଅଛନ୍ତି । ଅଗ୍ନିଶମ ବାହିନୀ ନିଖୋଜ ବ୍ୟକ୍ତିମାନଙ୍କୁ ଉଦ୍ଧାର କରିବା ପାଇଁ ଜୋରଦାର ଉଦ୍ୟମ କରୁଛି । ନିଖୋଜ ବ୍ୟକ୍ତିମାନେ ହେଲେ ସାବିତ୍ରୀ କିରସାନି (୧୮), ରାମା କିରସାନି (୧୮), ବବିତା ହେନ୍ତାଳ ଓ ଜଣେ ଶିଶୁ । ଏମାନେ ସମସ୍ତେ ମୁଖିବିଦେଇ ଗାଁର । ବିଳମ୍ବିତ ରାତିରେ ବବିତାଙ୍କ ଶବ ଉଦ୍ଧାର କରାଯାଇଛି ।
ସୂଚନା ଅନୁସାରେ, ତେନ୍ତୁଳିପଡ଼ା ଗାଁର କିଛି ମହିଳାଙ୍କ ସମେତ ମୋଟ ୮ ଜଣ ଯାତ୍ରା ଦେଖିବାକୁ ଯାଇ କୋଲାବ ଜଳଭଣ୍ଡାରରେ ଏକ ଦେଶୀଡଙ୍ଗା ସାହାଯ୍ୟରେ ପୋଡ଼ଗଡ଼କୁ ଆସୁଥିଲେ । ଅପରାହ୍ଣ ପ୍ରାୟ ୪ଟା ସମୟରେ ଦେଶୀଡଙ୍ଗାଟି ପୋଡ଼ଗଡ଼ ଘାଟରେ ଭାରସାମ୍ୟ ହରାଇବାରୁ ଡଙ୍ଗାରେ ଥିବା ସମସ୍ତ ଯାତ୍ରୀ ବୁଡ଼ି ଯାଇଥିଲେ ।
ସ୍ଥାନୀୟ ଲୋକଙ୍କ ଠାରୁ ସୂଚନା ପାଇ ସ୍ଥାନୀୟ ଅଗ୍ନିଶମ ବାହିନୀ ୪ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲା । ୩ ଜଣ ଯୁବତୀ ଓ ଜଣେ ଶିଶୁ ନିଖୋଜ ଅଛନ୍ତି ।
About Author
