ନାମଫଳକରେ ଓଡିଆ ଭାଷାର ସ୍ଥାନ କେଉଁଠି
ଭୁବନେଶ୍ୱର,୭ା୪(ତଥ୍ୟ) ଓଡିଆ ଭାଷାରେ ନାମଫଳକ ନଲେଖିଲେ ଜୋରିମାନା ପରିମାଣ ବଢିଥିବାବେଳେ ନାମଫଳକରେ ଓଡିଆ କେଉଁଠି ସ୍ଥାନ ପାଇବ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ନାମ ଫଳକରେ ଭାଷା ବ୍ୟବହାର ସଂକ୍ରାନ୍ତରେ ଯେଉଁ ଜାତୀୟ ନୀତି ରହିଛି ତାହାର ଅନୁପାଳନ କିପରି ହେବ ସେ ସଂକ୍ରାନ୍ତରେ ଭାଷା ପ୍ରେମୀମାନେ ପ୍ରଶ୍ନ ଉଠାଇଛନ୍ତି ।
ଜାତୀୟ ମାର୍ଗଦର୍ଶିକା ଅନୁଯାୟୀ ନାମଫଳକର ଉପରେ ଆଞ୍ଚଳିକ ଭାଷା, ମଝିରେ ରାଷ୍ଟ୍ରଭାଷା ଓ ସବା ତଳେ ଇଂରାଜୀ ଓ ଅନ୍ୟାନ୍ୟ ଭାଷା ରହିବାକଥା । କେବଳ ସେତିକି ନୁହେଁ, ନାମଫଳକରେ ବ୍ୟବହୃତ ହୋଇଥିବା ବିଭିନ୍ନ ଭାଷାର ଲିପି ମଧ୍ୟରେ ଆଞ୍ଚଳିକ ଭାଷାର ଲିପି ଛୋଟ ହୋଇପାରିବ ନାହିଁ । ବିଭିନ୍ନ ରେଳଷ୍ଟେସନ ଠାରୁ ଆରମ୍ଭ କରି ରିଜର୍ଭବ୍ୟାଙ୍କ୍ ଓ ଅନ୍ୟାନ୍ୟ କେନ୍ଦ୍ରୀୟ ଦପ୍ତରରେ ଏହାକୁ କଡାକଡି ଭାବେ ପାଳନ କରାଯାଉଛି । ଏମିତିକି ଭାରତୀୟ ଷ୍ଟେଟବ୍ୟାଙ୍କ୍ ସମେତ ବିଭିନ୍ନ ଜାତୀୟକରଣ ବ୍ୟାଙ୍କ୍ ସେମାନଙ୍କ ନାମଫଳକରେ ସର୍ବାଗ୍ରେ ଓଡିଆ ଲେଖୁଛନ୍ତି । ଅଥଚ ଅନେକ ରାଜ୍ୟ ସରକାରୀ ସଂସ୍ଥା ଓଡିଆ ବଦଳରେ ଇଂରାଜୀକୁ ଅଧିକ ପ୍ରାଧାନ୍ୟ ଦେଇ ଓଡିଆକୁ ଛୋଟ କରୁଥିବା ଲକ୍ଷ୍ୟ କରାଯାଉଛି ।
ଅନୁଗୁଳର ଗୋପବନ୍ଧୁ ପାର୍କରେ ବସାଯାଇଥିବା ବରପୁତ୍ର ଓ ପୁତ୍ରୀମାନଙ୍କ ବିକୃତ ମୂର୍ତ୍ତି ତଳେ ସେମାନଙ୍କ ନାମ ପ୍ରଥମେ ଇଂରାଜୀରେ ଓ ପରେ ଓଡିଆରେ ଲେଖାହୋଇଛି । ଏହା ସିଧାସଳଖ ଭାବେ ମାର୍ଗଦର୍ଶିକାର ଖୋଲା ଉଲ୍ଲଙ୍ଘନ କରୁଛି ।
ଭୁବନେଶ୍ୱର, କଟକ ଠାରୁ ଆରମ୍ଭ କରି ରାଜ୍ୟର ବିଭିନ୍ନ ଅଞ୍ଚଳରେ ଅନେକ ସରକାରୀ ଦପ୍ତରର ନାମଫଳକରେ ପ୍ରଥମେ ଇଂରାଜୀ ଓ ପରେ ଓଡିଆ ଭାଷାରେ ଲେଖାଯାଉଛି । ଆଉ କେତେକ କ୍ଷେତ୍ରରେ ନାମଫଳକକୁ ଛୋଟ ଛୋଟ ଓଡିଆ ଅକ୍ଷରରେ ଲେଖି ସେଥିରେ ବଡ ବଡ ଅକ୍ଷରରେ ଇଂରାଜୀ ରହୁଛି । ଏହା ବି ଓଡିଆ ଭାଷା ପ୍ରତି ଅବମାନନା ଓ ଅପମାନ ବୋଲି ଓଡିଆ ଭାଷାର ସୁରକ୍ଷା ଓ ସମୃଦ୍ଧି କ୍ଷେତ୍ରରେ କାର୍ଯ୍ୟ କରୁଥିବା ବିଭିନ୍ନ ସଂଗଠନ ଓ ବିଶିଷ୍ଟ ବ୍ୟକ୍ତି ମତବ୍ୟକ୍ତ କରୁଛନ୍ତି ।
ବହୁ ବାଣିଜି୍ୟକ ଓ ଘରୋଇ ପ୍ରତିଷ୍ଠାନ ସେମାନଙ୍କ ନାମଫଳକରେ ଓଡିଆକୁ ଉପେକ୍ଷା କରି ଇଂରାଜୀକୁ ପ୍ରାଧାନ୍ୟ ଦେଉଥିବାବେଳେ ଆଉ ଯେଉଁମାନେ ଏଠାରେ ଉଭୟ ଓଡିଆ ଓ ଇଂରାଜୀରେ ଫଳକୁ ଲେଖୁଛନ୍ତି ସେଥିରୁ ଅଧିକାଂଶରେ ଉପରେ ଇଂରାଜୀ ଓ ତଳେ ଓଡିଆ ଭାଷା ରହୁଛି । ଏହା ଓଡିଆ ଭାଷା ପ୍ରତି ବଡ ଧରଣର ଅପମାନ ହେଉଥିବାରୁ ଏ କ୍ଷେତ୍ରରେ ମଧ୍ୟ କଠୋର ଦଣ୍ଡବିଧାନର ଆବଶ୍ୟକତା ରହିଛି ।
ସେହିଭଳି ରାଜ୍ୟ ସରକାରଙ୍କ ବହୁ ଦପ୍ତରରେ ଇଂରାଜୀରେ ଚିଠିପତ୍ର ଆଦାନ ପ୍ରଦାନ ସହ ନଥିପତ୍ରରେ ବି ଓଡିଆ ବଦଳରେ ଇଂରାଜୀ ଭାଷାର ବହୁଳ ବ୍ୟବହାର ହେଉଛି । ଯେଉଁ ଦପ୍ତର ଓ ତାହାର ଅଧିକାରୀମାନେ ସରକାରୀ କାମରେ ଓଡିଆ ବଦଳରେ ଇଂରାଜୀ ବ୍ୟବହାର କରୁଛନ୍ତି ଏବଂ ସରକାରୀ କାର୍ଯ୍ୟକ୍ରମର ନିମନ୍ତ୍ରଣପତ୍ର ଆଦି ଇଂରାଜୀରେ ଛପାଉଛନ୍ତି ସେମାନଙ୍କ ବିରୁଦ୍ଧରେ ବି କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି । ଏହାଛଡା ସାଧାରଣ ଲୋକେ ବିବାହ, ବ୍ରତୋପନୟନ, ଶୁଦ୍ଧିକ୍ରିୟା ଠାରୁ ଆରମ୍ଭ କରି ଅନ୍ୟାନ୍ୟ ପୂଜାପାର୍ବଣ ପାଇଁ ଛପାଉଥିବା ନିମନ୍ତ୍ରଣପତ୍ର କାହିଁକି ଓଡିଆ ପରିବର୍ତ୍ତେ ଇଂରାଜୀରେ ହେଉଛି ସେଥିଘେନି ମଧ୍ୟ ପ୍ରଶ୍ନବାଚୀ ଉଠୁଛି ।
About Author
