ମହିଳା ସମେତ ୨ଜଣଙ୍କୁ ଦଳିଦେଲା ଦନ୍ତା
ଢେଙ୍କାନାଳ, ୨୧ା୧ (ଆପ୍ର): ଢେଙ୍କାନାଳ ବନଖଣ୍ଡ ମହାବିରୋଡ ରେଞ୍ଜ ଖାଲପାଳ ଏବଂ ଗଡ଼ପରଜଙ୍ଗ ଗଣ୍ଡତଇଳା ସାହିରେ ଦନ୍ତାହାତୀ ଆକ୍ରମଣରେ ୨ ଜଣଙ୍କର ମୃତୁ୍ୟ ଘଟିଛି । ପରଜଙ୍ଗ ବ୍ଲକ ଡିହଡୋଳ ସେକ୍ସନ ଖାଲପାଳର ଅଲେଖ ନାଏକ (୭୩) ଶନିବାର ଭୋରରେ ଘର ନିକଟ ପଡ଼ିଆକୁ ବାହ୍ୟକର୍ମ କରିବାକୁ ଯାଇଥିବା ସମୟରେ ଦନ୍ତାହାତୀ ତାଙ୍କୁ ଆକ୍ରମଣ କରିଥିଲା । ଉକ୍ତ ହାତୀ ଅଲେଖଙ୍କୁ କଚାଡି ଦେବା ସହିତ ଦଳିଦେବାରୁ ଘଟଣାସ୍ଥଳରେ ତାଙ୍କର ମୃତୁ୍ୟ ହୋଇଥିଲା ।
ସେହିପରି ଗଡ଼ପରଜଙ୍ଗ ଗ୍ରାମର ଦାଶରଥୀ ନାୟକଙ୍କର ଗଣ୍ଡତଇଳା ସାହିରେ ଏକ ଫାର୍ମ ହାଉସ ରହିଛି । ସେହି ଫାର୍ମରେ ଦାଶରଥୀ ଏବଂ ତାଙ୍କ ପତ୍ନୀ ବାରି ନାୟକ ରହୁଥିଲେ । ଶନିବାର ଭୋର ସମୟରେ ବାରି (୭୨) ଶୌଚ ହେବାକୁ ଯିବାବେଳେ ଦନ୍ତାହାତୀ ଆକ୍ରମଣର ଶିକାର ହୋଇଥିଲେ । ଦନ୍ତା ହାତୀ ଶୁଣ୍ଢରେ ଟେକି କଚାଡି ଦେବାରୁ ଘଟଣା ସ୍ଥଳରେ ତାଙ୍କର ପ୍ରାଣହାନି ଘଟିଥିଲା । ବନବିଭାଗ କର୍ମଚାରୀମାନେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ପରଜଙ୍ଗ ପୁଲିସ ଶବ ବ୍ୟବଛେଦ କରାଇ ପରିବାରକୁ ହସ୍ତାନ୍ତର କରିଛି । ଏହି ଅଞ୍ଚଳରେ ବାରମ୍ବାର ହାତୀ ଆକ୍ରମଣ ହେଉଛି । ବନ ବିଭାଗ ହାତୀର ଗତି ବିଧି ସମ୍ପର୍କରେ ଗ୍ରାମବାସୀଙ୍କୁ ସୂଚନା ଦେଉ ନ ଥିବାରୁ ବହୁ ଧନ ଜୀବନହାନି ଘଟୁଛି ବୋଲି ଅଭିଯୋଗ ହୋଇଛି ।
About Author
