ଆମେରିକାରେ ବିମାନ ସେବା ଠପ୍
ୱାଶିଂଟନ୍, ୧୧ା୧: ଆମେରିକାରେ ବୁଧବାର ଏୟାର ମିଶନ୍ ସିଷ୍ଟମ୍ ଅଚଳ ହୋଇଯିବାରୁ ଦେଶ ସାରା ବିମାନ ଚଳାଚଳ ବନ୍ଦ ହୋଇଯାଇଛି । ନୁ୍ୟୟର୍କ ଟାଇମ୍ସ ରିପୋର୍ଟ ଅନୁଯାୟୀ ସନ୍ଧ୍ୟା ସୁଦ୍ଧା ୫ ହଜାରରୁ ଉଡାଣରେ ବିଳମ୍ବ ଘଟିଛି । ୨୫୪ ଡୋମେଷ୍ଟିକ୍ ଓ ଇଣ୍ଟରନ୍ୟାସନାଲ୍ ଫ୍ଲାଇଟ୍କୁ ବାତିଲ କରିଦିଆଯାଇଛି । ସଂଘୀୟ ବିମାନ ସେବା ପ୍ରଶାସନର ୱେବ୍ସାଇଟ୍ରେ ଏହାର କାରଣ ସମ୍ପର୍କରେ କୁହାଯାଇଛି ଯେ ନୋଟିସ୍ ଟୁ ଏୟାର୍ ମିଶନ (ନୋଟେମ୍)ରେ ଆକସ୍ମିକ ବିଭ୍ରାଟ ଯୋଗୁ ଦେଶ ଭିତରେ ସବୁ ଉଡାଣ ରଦ୍ଦ କରିବାକୁ ପଡିଲା । ଏହା ସାଇବର୍ ଆଟାକ୍ ଯୋଗୁଁ ହୋଇନାହିଁ । ପରିସ୍ଥିତି ସୁଧିବାକୁ ୨ ଦିନ ଲାଗିପାରେ । ରାଷ୍ଟ୍ରପତି ଜୋ ବାଇଡନ୍ ହ୍ୱାଇଟ୍ ହାଉସ୍ରେ ଜରୁରୀ ବୈଠକ ଡାକି ରିପୋର୍ଟ ତଲବ କରିଛନ୍ତି ।
ଆମେରିକା ଇତିହାସରେ ପ୍ରଥମ ଥର ପାଇଁ ଏତେବଡ ପ୍ରଯୁକ୍ତିଗତ ବିଭ୍ରାଟ ଘଟିଛି ବୋଲି ହ୍ୱାଇଟ୍ହାଉସ୍ ପକ୍ଷରୁ ଏକ ବିବୃତିରେ କୁହାଯାଇଛି । ପ୍ରେସ୍ ସେକ୍ରେଟରୀ କେରିନ୍ ଜିନ୍ ପିୟରେଙ୍କ ବକ୍ତବ୍ୟ ଉଦ୍ଧାର କରି ଏନ୍ବିସି ନୁ୍ୟଜ୍ରେ କୁହାଯାଇଛି- ପରିବହନ ସଚିବ ରାଷ୍ଟ୍ରପତି ବାଇଡନ୍ଙ୍କୁ ଭେଟି ସବୁ ଫ୍ଲାଇଟ୍ ବାତିଲ ସମ୍ପର୍କରେ ଅବଗତ କରାଇଛନ୍ତି । ଏପର୍ଯ୍ୟନ୍ତ ତଦନ୍ତରୁ ସାଇବର ଆକ୍ରମଣର ସାମନ୍ୟତମ ସୂଚନା ମିଳିନାହିଁ । ତେବେ ରାଷ୍ଟ୍ରପତି ଏହାର ପୁଙ୍ଖାନୁପୁଙ୍ଖ ତଦନ୍ତ ଆଦେଶ ଦେଇଛନ୍ତି ।
ବିଳମ୍ବିତ ରାତିରେ ପରିସ୍ଥିତି ଧୀରେ ଧୀରେ ସୁଧୁରୁ ଥିବାବେଳେ ସଂଘୀୟ ଆଭିଏସନ୍ ଏଜେନ୍ସି ପକ୍ଷରୁ ଏକ ଆଡ୍ଭାଇଜରୀ ଜାରି କରାଯାଇଛି । ସେଥିରେ କୁହାଯାଇଛି, ଆମେରିକୀୟ ସମୟ ଭୋର୍ ୫ଟା ୩୧ ବେଳେ ଏହି ଟେକ୍ନିକାଲ୍ ଫଲ୍ଟ ସାମ୍ନାକୁ ଆସିଥିଲା । ତା’ର କାରଣ ସ୍ପଷ୍ଟ ହୋଇନାହିଁ । ଉଡାଣ ବ୍ୟବସ୍ଥା କେବେ ପୂରାପୂରି ସୁଧୁରିବ କହିହେଉନାହିଁ ।
ରୟଟର ରିପୋର୍ଟ ଅନୁଯାୟୀ ଫେଡେରାଲ୍ ଆଭିଏସନ୍ ଆଡ୍ମିନିଷ୍ଟ୍ରେସନ୍ (ଏଫ୍ଏଏ) ସିଷ୍ଟମ୍ ପାଇଲଟ୍ ଓ ଅନ୍ୟ ଫ୍ଲାଇଟ୍ କର୍ମଚାରୀମାନଙ୍କୁ ସମ୍ଭାବ୍ୟ ବିପଦ ତଥା ବିମାନବନ୍ଦରରେ ପରିବର୍ତ୍ତିତ ସ୍ଥିତି ସମ୍ପର୍କରେ ସୂଚନା ଦେଇଥାଏ । ଏହି ସିଷ୍ଟମ୍ ଠିକ୍ ରୂପେ କାମ କରୁନାହିଁ ।
About Author
