୧୬ ଯବାନ ସହିଦ
ଖାଇକୁ ଖସିଲା ଆର୍ମି ଟ୍ରକ୍
ଗ୍ୟାଙ୍ଗଟକ୍, ୨୩ା୧୨: ସିକ୍କିମ୍ର ଉତ୍ତରବର୍ତ୍ତୀ ଲାଚେନ୍ଠାରୁ ୧୫ କି.ମି. ଦୂର ଜେମା ଇଲାକାରେ ଶୁକ୍ରବାର ଏକ ଆର୍ମି ଟ୍ରକ୍ ଦୁର୍ଘଟଣାଗ୍ରସ୍ତ ହେବା ଫଳରେ ୧୬ ଜଣ ଯବାନ ସହିଦ ହୋଇଛନ୍ତି । ଏମାନଙ୍କ ମଧ୍ୟରେ ୩ ଜଣ ଜୁନିୟର କମିସନ୍ଡ ଅଫିସର ଅନ୍ତର୍ଭୁକ୍ତ ।
ସେନା ସୂତ୍ରରୁ ପ୍ରାପ୍ତ ସୂଚନା ଅନୁଯାୟୀ, ଆଗପଛ ହୋଇ ୩ଟି ଗାଡି ଶୁକ୍ରବାର ସକାଳେ ଚାଟେନ୍ଠାରୁ ଥଙ୍କୁ ଅଭିମୁଖେ ଯାଉଥିଲା । ଜେମା ରାସ୍ତାରେ ଗୋଟିଏ ଗାଡି ତୀବ୍ର ମୋଡ ବୁଲିବା ବେଳା ଚକ ସ୍ଲିପ୍ କରିବାରୁ ଖାଇ ଭିତରକୁ ଖସିପଡିଥିଲା । ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ୪ ଜଣ ଆହତ ସୈନିକଙ୍କୁ ବିମାନ ଯୋଗେ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ଭାରତୀୟ ସେନା ଏହି ଦୁଃଖ ସମୟରେ ଶୋକ ସନ୍ତପ୍ତ ପରିବାରଙ୍କ ପଛରେ ଛିଡା ହୋଇଛି ବୋଲି ପ୍ରତିରକ୍ଷା ବିଭାଗର ଜନସମ୍ପର୍କ ଅଧିକାରୀ ଲେଫ୍ଟନାଣ୍ଟ କର୍ଣ୍ଣେଲ୍ ମହେନ୍ଦ୍ର ରାଉତ କହିଛନ୍ତି ।
ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଗୃହମନ୍ତ୍ରୀ ଅମିତ ଶାହା ଗଭୀର ଶୋକବ୍ୟକ୍ତ କରିଛନ୍ତି ।
About Author
