ଅଳ୍ପକେ ବର୍ତ୍ତିଲା ପେଟ୍ରୋଲ୍ ପମ୍ପ
ଜଳିଗଲା ୮ ଦୋକାନ
ବାରିପଦା (ଆପ୍ର): ସ୍ଥାନୀୟ ସରକାରୀ ବସଷ୍ଟାଣ୍ଡ ଠାରେ ବୁଧବାର ବିଳମ୍ବିତ ରାତିରେ ଭୟାବହ ଅଗ୍ନିକାଣ୍ଡ ଘଟିଛି । ଏଥିରେ ୮ ଟି ଦୋକାନ ଘର ସମ୍ପୂର୍ଣ୍ଣ ଭାବେ ପୋଡ଼ି ନଷ୍ଟ ହୋଇଛି । ସୂଚନା ଅନୁଯାୟୀ, ସରକାରୀ ବସଷ୍ଟାଣ୍ଡ ସ୍ଥିତ ମୁଖ୍ୟ ଡାକଘର ନିକଟରେ ଥିବା ଦୋକାନରେ ବୁଧବାର ରାତି ପ୍ରାୟ ଦେଢ଼ଟା ବେଳେ କୌଣସି କାରଣ ଯୋଗୁଁ ଅଗ୍ନି ସଂଯୋଗ ହୋଇଥିଲା । ଅଗ୍ନି ଶିଖା ବ୍ୟାପିବା ପରେ ଘଟଣା ଲୋକ ଲୋଚନକୁ ଆସିଥିଲା । ସ୍ଥାନୀୟ ଲୋକେ ଦେଖି ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ବାରିପଦା ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ଏହି ଭୟାବହ ଅଗ୍ନିକାଣ୍ଡରେ ୮ ଟି ଦୋକାନ ଘର ଜଳିଯାଇଛି । ନିଆଁକୁ ଆୟତ୍ତ କରିବାରୁ ଏକ ବଡ଼ ଧରଣର ଅଘଟଣରୁ ସମସ୍ତେ ବର୍ତ୍ତି ଯାଇଛନ୍ତି । ଉକ୍ତ ଦୋକାନ ନିକଟରେ ଏକ ପେଟ୍ରୋଲ ପମ୍ପ୍ ରହିଛି । କେଉଁ କାରଣରୁ ଅଗ୍ନିକାଣ୍ଡ ଘଟିଛି ତାହା ସ୍ପଷ୍ଟ ହୋଇନଥିବା ବେଳେ ବିଦ୍ୟୁତ୍ ସର୍ଟ ସର୍କିଟ୍ ଯୋଗୁଁ ଅଗ୍ନିକାଣ୍ଡ ଘଟିଥିବା ନେଇ ଅଗ୍ନିଶମ ଅଧିକାରୀ ଭବେନ୍ଦ୍ର ନାଥ ଦେ ସୂଚନା ଦେଇଛନ୍ତି । ଅଗ୍ନିକାଣ୍ଡରେ ଜନସାଧାରଣଙ୍କ କିଛି କ୍ଷତି ହୋଇ ନଥିବା ବେଳେ ଦୋକାନୀଙ୍କ ଲକ୍ଷ୍ୟାଧିକ ଟଙ୍କାର ଜିନିଷପତ୍ର ନଷ୍ଟ ହୋଇଥିବା ଜଣାପଡ଼ିଛି ।
About Author
