ଦୁର୍ଘଟଣାରେ ଶିକ୍ଷୟିତ୍ରୀ ଓ କିରାଣି ମୃତ
ଘୁ. ଉଦୟଗିରି, ୨୬ା୧୧ (ଆପ୍ର): ଶନିବାର ସକାଳେ ମର୍ମତୁଦ ସଡ଼କ ଦୁର୍ଘଟଣାରେ ଲିଙ୍ଗାଗଡ଼ କନ୍ୟାଶ୍ରମର ଶିକ୍ଷୟିତ୍ରୀ ଓ ମହିଳା କ୍ଲର୍କ ମୃତୁ୍ୟବରଣ କରିଛନ୍ତି ।
ଶନିବାର ସକାଳୁଆ ଥିବାରୁ ଉଭୟେ ସ୍କୁଲକୁ ଯିବା ବେଳେ ଦୁର୍ଘଟଣାର ଶିକାର ହୋଇଛନ୍ତି । ମାଲିକାପଡ଼ି ପଞ୍ଚାୟତ କୁପାଗୁଡ଼ା ଗ୍ରାମର ବିମଳା ପ୍ରଧାନ (୪୭) ଓ ଘୁ. ଉଦୟଗିରିରେ ରହୁଥିବା ନୟାଗଡ଼ ଜିଲ୍ଲା ଇଟାମାଟି ନିବାସୀ ପ୍ରଦୀପ୍ତା ସାହୁ (୩୪) ସ୍କୁଟି ଯୋଗେ ଯାଉଥିବାବେଳେ ବିପରୀତ ଦିଗରୁ ଆସୁଥିବା ଏକ ପଲ୍ସର୍ ନିଲୁଙ୍ଗିଆ ପୂର୍ବରୁ ଥିବା ବୁଲାଣି ରାସ୍ତାରେ ଧକ୍କା ଦେଇଥିଲା । ଏଥିରେ ସ୍କୁଟି ଆରୋହୀ ୨ମହିଳାଙ୍କ ସହ ବାଇକ୍ ଚାଳକ ମଧ୍ୟ ଆହତ ହୋଇଥିଲେ ।
ସ୍ଥାନୀୟ ଲୋକେ ଆହତମାନଙ୍କୁ ଡାକ୍ତରଖାନାକୁ ନେଇଥିଲେ । ମାତ୍ର ସେଠାରେ ଡାକ୍ତର ଉଭୟ ମହିଳାଙ୍କୁ ମୃତ ଘୋଷଣା କରିଥିଲେ । ଗୁରୁତର ଥିବାରୁ ବାଇକ୍ ଚାଳକଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ଥାନା ଆଇଆଇସି ଅଜୟ ସ୍ୱାଇଁ, ଏସ୍ଆଇ ଅନନ୍ତ ପ୍ରଧାନ, ଏଏସ୍ଆଇ ବିନୟ ମହାରଣା ମେଡିକାଲରେ ପହଞ୍ଚି ତଦନ୍ତ କରିଛନ୍ତି । ଆଇଆଇସିଙ୍କ ନିଦେ୍ର୍ଦଶରେ ଏସ୍ଆଇ ପ୍ରଧାନ ଦୁର୍ଘଟଣାସ୍ଥଳକୁ ଯାଇଥିଲେ । ପ୍ରାଥମିକ ଚିକିତ୍ସା ପରେ ଅନ୍ୟ ଜଣେ ବାଇକ୍ ଆରୋହୀ କିଟୁନ ପ୍ରଧାନଙ୍କୁ ପୁଲିସ ଥାନାକୁ ନେଇ ପଚରାଉଚରା କରିଛି । ବାଇକ ଚାଳକ ଓ ଆରୋହୀ ଉଭୟ ନାବାଳକ ଥିବାବେଳେ ବେପରୁଆ ଗାଡ଼ି ଚାଳନା ଯୋଗୁଁ ୨ ଅମୂଲ୍ୟ ଜୀବନ ଚାଲିଗଲା । ପୁଲିସ ମାମଲା ରୁଜୁ କରି ଦୁର୍ଘଟଣାସ୍ଥଳରୁ ସ୍କୁଟି ଓ ବାଇକ୍ ଜବତ କରି ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି ।
About Author
