ବସ୍ ଭିତରେ ନାବାଳିକାକୁ ଅସଦାଚରଣ
ବାଦାମବାଡ଼ି ବସ୍ଷ୍ଟାଣ୍ଡରେ ଅଘଟଣ
କଟକ (ବୁ୍ୟରୋ): ବସ ଭିତରେ ନାବାଳିକାଙ୍କୁ ଅସଦାଚରଣ ଅଭିଯୋଗ । ଅନୁଗୋଳରୁ କଟକ ଆସିଥିବା ଏକ ଘରୋଇ ବସର କଣ୍ଡକ୍ଟର ବିରୋଧରେ ଏଭଳି ସଙ୍ଗୀନ ଅଭିଯୋଗ ଆସିଛି । ଏ ନେଇ ବାଦାମବାଡି ଥାନାରେ ନାବାଳିକାଙ୍କ ପରିବାର ପକ୍ଷରୁ ଅଭିଯୋଗ ହେବାପରେ କମିଶନରେଟ ପୁଲିସ ଆରମ୍ଭ କରିଛି ତଦନ୍ତ । ଅଭିଯୋଗ ଅନୁସାରେ ଗତ ୫ ତାରିଖ ରାତି ପ୍ରାୟ ୧୦ଟା ସମୟରେ ନିଜ ବାପାଙ୍କ କୌଣସି କାମରେ କଟକସ୍ଥିତ ଅନୁଗୋଳ ବସଷ୍ଟାଣ୍ଡ ଆସିଥିବା ସମୟରେ ନାବାଳିକାଙ୍କ ସହିତ ଘଟିଥିଲା ଏହି ଅଘଟଣ । ନାବାଳିକାଙ୍କ ବାପା ଝିଅକୁ ବସ୍ଷ୍ଟାଣ୍ଡରେ ଛାଡ଼ି କିଛି ସମୟ ପାଇଁ ଷ୍ଟାଣ୍ଡ ବାହାରକୁ ଆସିଥିଲେ । ଏହି ସମୟରେ ଅନୁଗୋଳରୁ କଟକ ଆସିଥିବା ମହାନ୍ତି ବସର କଣ୍ଡକ୍ଟର ନାବାଳିକା ଜଣଙ୍କୁ ଏକୁଟିଆ ପାଇ ତାଙ୍କୁ ଜୋର୍ କରି ବସ ଭିତରକୁ ଭିଡ଼ି ନେଇଯାଇଥିଲା । ବସଟି ସମ୍ପୂର୍ଣ୍ଣ ଖାଲିଥିବାବେଳେ ଏହାର ସୁଯୋଗ ନେଇ ବସ ମଧ୍ୟରେ ନାବାଳିକାଙ୍କ ପ୍ରତି ଅସଦାଚରଣ କରିଥିଲା । ତେବେ ନାବାଳିକା ଜଣଙ୍କ କୌଶଳ କ୍ରମେ ବସ ଭିତରୁ ବାହାରି ଆସି ସ୍ଥାନୀୟ ବ୍ୟବସାୟୀମାନଙ୍କୁ ଜଣାଇବା ପରେ ଘଟଣାଟି ପ୍ରଘଟ ହୋଇଥିଲା । ଅଭିଯୋଗ ପରେ ଏହି ଦିଗରେ କମିଶନରେଟ ପୁଲିସ ତଦନ୍ତ ଜାରି ରଖିଛି । ସମ୍ପୃକ୍ତ ଅଭିଯୁକ୍ତ କଣ୍ଡକ୍ଟର ଫେରାର ହୋଇଯାଇଥିବା ବେଳେ ତାଙ୍କୁ ଧରିବା ପାଇଁ କଟକ ଓ ଅନୁଗୋଳର ବିଭିନ୍ନ ସ୍ଥାନରେ ଛାପା ମାରୁଛି ପୁଲିସ । ସେପଟେ ଅନୁଗୋଳରୁ କଟକ ଆସୁଥିବା ମହାନ୍ତି ବସର ଅଭିଯୁକ୍ତ କଣ୍ଡକ୍ଟର ଜଣଙ୍କ ନାଁରେ ପୂର୍ବରୁ ମଧ୍ୟ ଏହିଭଳି ଅଭିଯୋଗ ରହିଥିବା ସୂଚନା ରହିଛି । ତେବେ ଏନେଇ କଟକ ଅନୁଗୁଳ ବସ୍ଷ୍ଟାଣ୍ଡର ଜଣେ ବ୍ୟବସାୟୀ ପ୍ରତିକ୍ରିୟା ରଖିଛନ୍ତି ।
About Author
