ଚୋର ଗ୍ୟାଙ୍ଗ୍ ଠାବ, ୫ ଗିରଫ
ରାଜନଗର (ଆପ୍ର): ଦୀର୍ଘଦିନ ହେଲା ରାଜନଗରରେ ଆତଙ୍କ ସୃଷ୍ଟି କରି ପୁଲିସ ଆଖିରୁ ନିଦ ହଜାଇଥିବା ଚୋର ଗ୍ୟାଙ୍ଗକୁ ଧରିବାରେ ରାଜନଗର ପୁଲିସ ସଫଳ ହୋଇଛି । ଚଳିତବର୍ଷ ରାଜନଗର ଥାନାରେ ୩୦ ଚୋରି ମାମଲା ହୋଇଥିବା ବେଳେ ଧରା ପଡିଥିବା ଚୋର ଗ୍ୟାଙ୍ଗ ଅଧିକାଂଶ ମାମଲାରେ ସଂପୃକ୍ତ ଥିବା ପୁଲିସ ଜାଣିବାକୁ ପାଇଛି । ପୁଲିସ ୪ଜଣ ଚୋର ଓ ଚୋରି ସାମଗ୍ରୀ କିଣି ଅନ୍ୟତ୍ର ବିକ୍ରି କରିଥିବା ଜଣଙ୍କୁ ମିଶାଇ ୫ଜଣଙ୍କୁ ଗିରଫ କରିଥିବା ବେଳେ ଏହି ଗ୍ୟାଙ୍ଗର ଅନ୍ୟ ୩ଜଣ ଫେରାର ହୋଇଥିବା ସୂଚନା ଦେଇଛି । ଏମାନଙ୍କ ନିକଟରୁ ୪ଟି ୩୨ଇଞ୍ଚ ଏଲ୍ଇଡି ଟିଭି, ୨ଟି ଇନଭର୍ଟର ସହ ବ୍ୟାଟେରୀ, ୭ଟି ଇଣ୍ଡେନ ଗ୍ୟାସ ଟାଙ୍କି, ଦୁଇଟି ପାଣି ମୋଟର, ୪ଟି ଚେୟାର, ଗୋଟିଏ ଗ୍ୟାସ୍ଷ୍ଟୋଭ ଏବଂ ୨୦ହଜାର ଟଙ୍କା ଜବତ କରାଯାଇଛି । ଏହାସହ ଚୋରିରେ ବ୍ୟବହୃତ ୨ଟି ଡାଲା ଅଟୋ ଏବଂ ଗୋଟିଏ ବାଇକ୍ ଜବତ କରାଯାଇଛି । ସେପଟେ ଚୋରିରେ ସମ୍ପୃକ୍ତ ଅନ୍ୟ ୩ଜଣଙ୍କୁ ଗିରଫ କରିବା ପାଇଁ ପୁଲିସ୍ ବିଭିନ୍ନ ସ୍ଥାନରେ ଚଢାଉ ଜାରି ରହିଛି ।
ଚଳିତମାସ ୧୭ରେ ରାଜନଗର-ଗୁପ୍ତି ମୁଖ୍ୟ ରାସ୍ତାର ଗୁପ୍ତି ନିକଟରେ ଥିବା ରଞ୍ଜନ ବେହେରାଙ୍କ ଘର ଗ୍ରୀଲ୍ କାଟି ଏବଂ ଆଲମିରା ଭାଙ୍ଗି ୩୦ହଜାର ଟଙ୍କା ଏବଂ ଅନ୍ୟାନ୍ୟ କାଗଜପତ୍ର ଲୁଟ୍ କରାଯାଇଥିଲା । ପୁଲିସ ମୋବାଇଲ୍ ଟ୍ରାକିଂ ଓ ସିସିଟିଭି ଫୁଟେଜରୁ ସଂଗ୍ରାମକୁ ଉଠାଇବା ରାଜନଗର ଗାଁର ସଂଗ୍ରାମ ମଳିକଙ୍କୁ ଉଠାଇ ଆଣିଥିଲା । ସଂଗ୍ରାମ ଠାରୁ ତଥ୍ୟ ପାଇ ତପନ ମଳିକ, ଅଜୟ ମଳିକ, ମାନସ ମଳିକ, ଅଶୋକ ମହାରଣାଙ୍କୁ ଗିରଫ କରି କୋର୍ଟଚାଲାଣ କରିଛି । ଚାରିଜଣ ଚୋରି କରି ଗିରଫ ହୋଇଥିବା ବେଳେ ଅଶୋକ ସେମାନଙ୍କ ଠାରୁ ଗ୍ୟାସ ସିଲିଣ୍ଡର ନିୟମିତ ଭାବେ କିଣିବା ଓ ତାହାକୁ ଅନ୍ୟତ୍ର ବିକ୍ରି କରିବା ଘଟଣାରେ ଗିରଫ ହୋଇଛି ।
About Author
