ଇଂଲଣ୍ଡ ଲିଜେଣ୍ଡ୍ସକୁ ଡୁବାଇଲେ ଜୟସୂରିୟା
ରୋଡ୍ ସେଫ୍ଟି ୱାର୍ଲ୍ଡ ସିରିଜ୍
କାନ୍ପୁର, ୧୩ା୯ (ଏଜେନ୍ସି): ଆନ୍ତର୍ଜାତିକ କ୍ରିକେଟ୍ ଛାଡ଼ିବାର ଅନେକ ବର୍ଷ ପରେ ବି ମଇଦାନରେ ଦେଖିବାକୁ ମିଳିଛି ଶ୍ରୀଲଙ୍କାର କିମ୍ବଦନ୍ତୀ କ୍ରିକେଟର୍ ସନତ ଜୟସୂରିୟାଙ୍କ ଯାଦୁ । ମଙ୍ଗଳବାର ରୋଡ୍ ସେଫ୍ଟି ୱାର୍ଲ୍ଡ ସିରିଜ୍ର ପଞ୍ଚମ ମ୍ୟାଚ୍ରେ ବାମହାତି ସ୍ପିନର୍ ଜୟସୂରିୟାଙ୍କ ପ୍ରଭାବଶାଳୀ ବୋଲିଂ ବଳରେ ଶ୍ରୀଲଙ୍କା ଲିଜେଣ୍ଡ୍ସ ୭ ୱିକେଟ୍ରେ ଇଂଲଣ୍ଡ ଲିଜେଣ୍ଡ୍ସକୁ ହରାଇ ସହଜ ବିଜୟ ହାସଲ କରିଛି । ଜୟସୂରିୟା ପ୍ଲେୟାର୍ ଅଫ୍ ଦ ମ୍ୟାଚ୍ ବିବେଚିତ ହୋଇଛନ୍ତି ।
ଶ୍ରୀଲଙ୍କା ଲିଜେଣ୍ଡ୍ସ ଟସ୍ ଜିତି ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା । ଜୟସୂରିୟାଙ୍କ ବୋଲିଂ ଜାଲରେ ଛନ୍ଦି ହୋଇଥିଲେ ଇଂଲଣ୍ଡ ଲିଜେଣ୍ଡ୍ସର ମଧ୍ୟକ୍ରମ ବ୍ୟାଟର୍ । ଟିମ୍ ପକ୍ଷରୁ କୌଣସି ଖେଳାଳି ବଡ଼ ସ୍କୋର୍ ଛିଡ଼ା କରିପାରି ନ ଥିଲେ । ୪୨ ରନ୍ରେ ଅଧା ଟିମ୍ ପାଭିଲିଅନ୍ ଫେରିଥିଲା ଏବଂ ୧୯ ଓଭର୍ରେ ୭୮ ରନ୍ କରି ସମସ୍ତ ୱିକେଟ୍ ହରାଇଥିଲା ।
ଅଧିନାୟକ ଇଆନ୍ ବେଲ୍ ୧୫, ଫିଲ୍ ମଷ୍ଟାର୍ଡ ୧୪, ଷ୍ଟିଫେନ୍ ପାରୀ ୧୦, କ୍ରିସ୍ ସ୍କୋଫିଲ୍ଡ ଅପରାଜିତ ୧୦ ରନ୍ କରିଥିଲେ । ଏହାଛଡ଼ା ଅନ୍ୟ କେହି ଦୁଇ ଅଙ୍କ ଛୁଇଁ ପାରି ନ ଥିଲେ । ବିପକ୍ଷ ବୋଲର୍ ଜୟସୂରିୟା ୪ ଓଭର୍ରେ ମାତ୍ର ୩ ରନ୍ ଦେଇ ସର୍ବାଧିକ ୪ ୱିକେଟ୍ ଅକ୍ତିଆର କରିଥିଲେ । ନୁୱାନ କୁଳସେକରା ଓ ଚତୁରଙ୍ଗା ଡି ସିଲ୍ଭା ୨ଟି ଲେଖାଏଁ ଏବଂ ଇସୁରୁ ଉଦାନା ଓ ଜୀବନ ମେଣ୍ଡିସ୍ ଗୋଟିଏ ଲେଖାଏଁ ୱିକେଟ୍ ନେଇଥିଲେ ।
ଜବାବରେ ଶ୍ରୀଲଙ୍କା ଲିଜେଣ୍ଡ୍ସ ୧୪.୩ ଓଭର୍ରେ ୭୯ ରନ୍ କରି ବିଜୟୀ ହୋଇଥିଲା । ଟିମ୍ ପକ୍ଷରୁ ଦିଲ୍ଶାନ ମୁନୱୀରା ୨୪, ଉପୁଲ ତରଙ୍ଗା ୨୩ ଓ ଅଧିନାୟକ ତିଲକରତ୍ନ ଦିଲ୍ଶାନ ୧୫ ରନ୍ କରି ଆଉଟ୍ ହୋଇଥିବା ବେଳେ ଜୀବନ ମେଣ୍ଡିସ୍ ୮ ଓ ଚମରା ସିଲ୍ଭା କୌଣସି ସ୍କୋର୍ ନ କରି ଅପରାଜିତ ଥିଲେ ।
About Author
