ନୂଆ ଶିଳ୍ପ ଯୁଗରେ ସାମିଲ ହୁଅ
ନୂଆଦିଲ୍ଲୀ/ଭୁବନେଶ୍ୱର, ୩୧ା୮ (ବୁ୍ୟରୋ): ଓଡ଼ିଶାକୁ ଦେଶର ଅଗ୍ରଣୀ ପୁଞ୍ଜି ବିନିଯୋଗ ଲକ୍ଷ୍ୟସ୍ଥଳ କରାଯିବ । ଏହି ପ୍ରୟାସରେ ରାଜ୍ୟ ସରକାର ଲାଗିଥିବାବେଳେ ଓଡ଼ିଶାର ନୂଆ ଶିଳ୍ପ ଯୁଗରେ ସାମିଲ ହେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆମନ୍ତ୍ରଣ କରିଛନ୍ତି । ଫିକି ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ନୂଆଦିଲ୍ଲୀରେ ଆୟୋଜିତ ନିବେଶକ ସମ୍ମେଳନରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଯୋଗ ଦେଇ ୩୦ରୁ ଅଧିକ ଦେଶର ରାଷ୍ଟ୍ରଦୂତ ଏବଂ ୫୦ରୁ ଅଧିକ ପ୍ରତିନିଧୀଙ୍କ ସହ ଆଲୋଚନା କରିଛନ୍ତି ।
ଦୁବାଇ, ଅହମ୍ମଦାବାଦ ପରେ ଦିଲ୍ଲୀରେ ଓଡ଼ିଶା ଇନଭେଷ୍ଟର୍ସ ମିଟ୍ରେ ଯୋଗ ଦେଇଛନ୍ତି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ । ରାଜ୍ୟରେ ପୁଞ୍ଜିନିବେଶ ଓ ମେକ ଇନ ଓଡ଼ିଶା କନକ୍ଲେଭର ତୃତୀୟ ସଂସ୍କରଣରେ ଯୋଗ ଦେବା ନେଇ ମୁଖ୍ୟମନ୍ତ୍ରୀ ଶିଳ୍ପୋଦ୍ୟୋଗୀଙ୍କ ସହ ଆଲୋଚନା କରିବା ସହ ଆସନ୍ତା ନଭେମ୍ବର ୩୦ରୁ ଡିସେମ୍ବର ୪ ଯାଏ ଓଡ଼ିଶାରେ ହେବାକୁ ଥିବା ମେକ୍ ଇନ୍ ଓଡ଼ିଶାର ତୃତୀୟ ସଂସ୍କରଣରେ ଯୋଗ ଦେବାକୁ ଆମନ୍ତ୍ରଣ କୀରିଛନ୍ତି । ଆମେରିକା, ୟୁଏଇ, କାତାର, ଓମାନ୍, ଦକ୍ଷିଣ କୋରିଆ, ଅଷ୍ଟ୍ରେଲିଆ, ସାଉଦି ଆରବ, ବାହାରିନ୍, ଜର୍ମାନୀ, ଫ୍ରାନ୍ସ, ଇଟାଲୀ, ବେଲଜିୟମ୍, ସିଙ୍ଗାପୁର, ଜାପାନ ଆଦି ଦେଶର ରାଷ୍ଟ୍ରଦୂତଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିଥିଲେ । ମେକ୍ ଇନ୍ ଓଡ଼ିଶାର ତୃତୀୟ ସଂସ୍କରଣ ପୂର୍ବରୁ ଦେଶର ପ୍ରମୁଖ ସ୍ଥାନରେ ଓଡ଼ିଶା ନିବେଶକ ସମ୍ମିଳନୀ ଆୟୋଜନ କରୁଛି । ଦିଲ୍ଲୀ ପରେ ମୁମ୍ବାଇରେ ଏହି ସମ୍ମେଳନୀ ଦେଖିବାକୁ ମିଳିବାକୁ ଥିବାବେଳେ ଏହାକୁ ଆସନ୍ତା ୧୪ ତାରିଖରେ କରାଯିବାକୁ ସ୍ଥିର କରାଯାଇଥିବା ଜଣାପଡ଼ିଛି ।
ଏହି ଅବସରରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ସମାବେଶକୁ ସମସ୍ତଙ୍କୁ ସ୍ୱାଗତ କରିବା ସହ ରାଷ୍ଟ୍ରଦୂତଙ୍କ ସଭା ଆରମ୍ଭ କରିଥିଲେ । ବିକାଶ ଦୃଷ୍ଟିରୁ ଓଡିଶା କିପରି ଦେଶର ପ୍ରମୁଖ ରାଜ୍ୟ ହୋଇପାରିଛି, ଅଭିବୃଦ୍ଧି ହାର ବଢ଼ିଥିବାବେଳେ ଶିଳ୍ପାୟନରେ ମଧ୍ୟ ଆଗୁଆ ହେବାରେ ଲାଗିଛି । ମୁଖ୍ୟମନ୍ତ୍ରୀ ଶ୍ରୀ ନଟ୍ଟନାୟକଙ୍କ ନେତୃତ୍ୱରେ ଦୃଢ଼ ମୂଳଦୁଆ ସହ ଓଡ଼ିଶା ତାର ଚମକ୍ରାର ଯାତ୍ରା ଜାରି ରଖିଥିବା ଶ୍ରୀ ମହାପାତ୍ର କହିଛନ୍ତି । ବାଣିଜ୍ୟ ଓଡ଼ିଶା ପ୍ରସିଦ୍ଧ ଥିଲା । ଆଜି ଓଡ଼ିଶା ଭାରତରେ ଇସ୍ପାତ, ଷ୍ଟେନଲେସ ଷ୍ଟିଲ ଏବଂ ଆଲୁମିନିୟମର ବୃହତ୍ତମ ଉତ୍ପାଦକ ଅଟେ । ରାସାୟନିକ ପଦାର୍ଥ ଏବଂ ପେଟ୍ରୋକେମିକାଲ୍ସ, ଟେକ୍ସଟାଇଲ୍ ଏବଂ ପୋଷାକ, ଖାଦ୍ୟ ପ୍ରକ୍ରିୟାକରଣ ଏବଂ ଅନ୍ୟାନ୍ୟ କ୍ଷେତ୍ରରେ ଓଡ଼ିଶା ଅଗ୍ରଣୀ ଭାବରେ ଉଭା ହୋଇଥିବା ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର କହିଛନ୍ତି ।
ସମ୍ମାନିତ ଅତିଥି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକଙ୍କୁ ସମ୍ବୋଧିତ କରିବା ସହ ଅନ୍ୟ ବ୍ୟକ୍ତିଙ୍କୁ ଶୁଭେଚ୍ଛା ଜଣାଇ ଶ୍ରୀ ମହାପାତ୍ର କହିଛନ୍ତି, ଓଡିଶା ଭାରତର ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ମଧ୍ୟରୁ ଅନ୍ୟତମ ଏବଂ ଗତ ଦେଢ଼ଦଶନ୍ଧିରେ କ୍ରମାଗତ ଭାବେ ଜାତୀୟ ହାରଠାରୁ ଅଧିକ ବୃଦ୍ଧି ପାଇଛି । ଓଡ଼ିଶାର ପ୍ରାକୃତିକ ସମ୍ପଦର ସୁବିଧା ଏବଂ ଅବସ୍ଥାନ ହେତୁ ଏହା ପୂର୍ବ ଭାରତର ଏକ ପ୍ରମୁଖ ଶିଳ୍ପ ଗନ୍ତବ୍ୟସ୍ଥଳ ଭାବରେ ଶୀଘ୍ର ଉଦୀୟମାନ ହେଉଛି । ଗତ ୨୦ ବର୍ଷ ମଧ୍ୟରେ ଓଡ଼ିଶା ସରକାର ପ୍ରଗତିଶୀଳ ନୀତି, ଦକ୍ଷ ପ୍ରଶାସନ ଏବଂ ବୈଷୟିକ ହସ୍ତକ୍ଷେପ ମାଧ୍ୟମରେ ଏହି ପ୍ରାକୃତିକ ସୁବିଧାଗୁଡ଼ିକୁ ଉପଯୋଗ କରିବାକୁ ଧ୍ୟାନ ଦେଇଥିବା ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର କହିଛନ୍ତି ।
ଶ୍ରୀ ମହାପାତ୍ରଙ୍କ ସ୍ୱାଗତ ପରେ ସମସ୍ତ ଶିଳ୍ପୋଦ୍ୟୋଗୀଙ୍କୁ ନିମନ୍ତ୍ରଣ ପତ୍ର ପ୍ରଦାନ କରି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି, ମେକ୍ ଇନ୍ ଓଡିଶା କନକ୍ଲେଭ-୨୨ ଭୁବନେଶ୍ୱରରେ ୩୦ ନଭେମ୍ବରରୁ ୪ ନଭେମ୍ବର ୨୦୨୨ ପର୍ଯ୍ୟନ୍ତ ଅନୁଷ୍ଠିତ ହେବ ଏବଂ ଏକ ଅଂଶୀଦାର ଦେଶ ଭାବରେ ଏହି କାର୍ଯ୍ୟକ୍ରମରେ ଭାଗ ନେବାକୁ ଆପଣ ସମସ୍ତଙ୍କୁ ଆମନ୍ତ୍ରଣ କରାଯାଇଛି । କନକ୍ଲେଭରେ ସମସ୍ତ ଶିଳ୍ପେଦ୍ୟୋଗୀଙ୍କୁ ସବୁ ପ୍ରକାରର ସହଯୋଗ କରାଯିବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଆଶ୍ୱାସନା ପ୍ରକାଶ କରିଛନ୍ତି ।
ଶିଳ୍ପ, ଏମଏସଏମଇ ଏବଂ ଶକ୍ତି ମନ୍ତ୍ରୀ ପ୍ରତାପ ଦେବ କହିଛନ୍ତି, ଓଡ଼ିଶା ସର୍ବଦା ଚମକ୍ରାର ହସ୍ତତନ୍ତ ଶିଳ୍ପ ପାଇଁ ଜଣାଶୁଣା । ଆମେ ବର୍ତ୍ତମାନ ବୈଷୟିକ ବୟନ ଉପରେ ଧ୍ୟାନ ଦେଉଛୁ । ଭଦ୍ରକରେ ଏକ ବୈଷୟିକ ଟେକ୍ସଟାଇଲ୍ ପାର୍କ ସ୍ଥାପନ କରୁଛୁ ଯାହାକି ଆଇଓସିଏଲ୍ର ୩୦୦ କେଟିପିଏ ପଲିଷ୍ଟର ଏବଂ ଫାଇବର ପ୍ଲାଣ୍ଟ ଦ୍ୱାରା ପୁନର୍ବାର ଲଙ୍ଗର ହୋଇଛି । ରାସାୟନିକ ଏବଂ ପେଟ୍ରାକେମିକାଲ୍ସ ସେକ୍ଟର ଏବଂ ଟେକ୍ସଟାଇଲ୍ ସେକ୍ଟର ପରି, ଆମେ ଖାଦ୍ୟ ପ୍ରକ୍ରିୟାକରଣ, ଆଇଟି /ଆଇଟିଇଏସ୍, ଇଏସ୍ଡିଏମ୍ ଇତ୍ୟାଦି କ୍ଷେତ୍ରଗୁଡିକ ପାଇଁ ଦୃଢ଼ ଇକୋସିଷ୍ଟମ୍ ମଧ୍ୟ ବିକଶିତ କରିଛୁ ବୋଲି ମନ୍ତ୍ରୀ ଶ୍ରୀ ଦେବ କହିଛନ୍ତି । ଗତ ଦୁଇ ଦଶନ୍ଧିରେ ଓଡିଶାର ଶିଳ୍ପ ଅଭିବୃଦ୍ଧି ଉଚ୍ଚ କୁଶଳୀ କାର୍ଯ୍ୟ କୌଶଳ ବିକାଶ ଉପରେ ଧ୍ୟାନ ଦିଆଯାଇଛି । ପାଖାପାଖି ୨୦୦ ଇଞ୍ଜିନିୟରିଂ କଲେଜ ଏବଂ ୧୦୦୦ ଆଇଟିଆଇ ସହ ଆମେ ଦେଶର ସବୁଠାରୁ କୁଶଳୀ ଶ୍ରମିକ ସୃଷ୍ଟି କରୁଛୁ । ନିକଟରେ ଏହାର ପ୍ରଥମ, ୱାର୍ଲ୍ଡ ସ୍କିଲ୍ ସେଣ୍ଟର ପ୍ରତିଷ୍ଠା ହୋଇଛି । ରାଜ୍ୟରେ ଯୁବକ ଏବଂ ଉଦ୍ୟୋଗୀଙ୍କ ସାମର୍ଥ୍ୟକୁ ସମ୍ପୂର୍ଣ୍ଣ ରୂପେ ହୃଦୟଙ୍ଗମ କରିବାକୁ ଆମେ ଷ୍ଟାର୍ଟ ଅପ୍ ଓଡିଶା ଆରମ୍ଭ କରିଥିବା ମନ୍ତ୍ରୀ ଶ୍ରୀ ଦେବ କହିଛନ୍ତି । ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଶିଳ୍ପ ସଚିବ ହେମନ୍ତ ଶର୍ମା, ମୁଖ୍ୟମନ୍ତ୍ରୀଙ୍କ ସଚିବ (୫ଟି) ଭିକେ ପାଣ୍ଡିଆନ୍, ଅରୁଣ ଚାଓଲାଙ୍କ ସମେତ ବହୁ ପ୍ରତିଷ୍ଠିତ ବ୍ୟକ୍ତି ଉପସ୍ଥିତ ଥିଲେ ।
About Author
