୨ ଗିରଫ, ୧୫ ଲକ୍ଷର ଗୁଟଖା ଓ ମେସିନ୍ ଜବତ
ନକଲି ଗୁଟଖା କାରଖାନା ଠାବ
କୁକୁଡ଼ାଖଣ୍ଡି (ଆପ୍ର): ବ୍ରହ୍ମପୁର ସହରତଳି ଅଞ୍ଚଳ ତଥା ସଦର ଥାନା ଅଧୀନ ଲୋଚାପଡ଼ା ଗ୍ରାମ ଶ୍ରୀମାନଗରରେ ଦୀର୍ଘ ଦିନ ଧରି ଚାଲିଥିବା ଏକ ନକଲି ଗୁଟ୍ଖା କାରଖାନାକୁ ଏସ୍ପି ଡା. ଶ୍ରବଣା ବିବେକ ଏମ୍ଙ୍କ ନିଦେ୍ର୍ଦଶ ପ୍ରକାରେ ସଦର ପୁଲିସ ପକ୍ଷରୁ ଚଢ଼ଉ କରାଯାଇଛି । ବିପୁଳ ପରିମାଣର ଗୁଟ୍ଖା ସହ ଗୁଟଖା ପ୍ରସ୍ତୁତିରେ ବ୍ୟବହୃତ କଞ୍ଚାମାଲ ଓ ମେସିନ ଜବତ କରିଛି ପୁଲିସ । ଗୁଟ୍ଖା ପ୍ରସ୍ତୁତ କରୁଥିବା ଅଭିଯୋଗରେ ବ୍ରହ୍ମପୁର ନୂଆ କାଳୁପାତ୍ର ସାହିର ଶଙ୍କର କୁମାର ସାହୁ((୪୨)ଓ ହରିଡ଼ାଖଣ୍ଡି ତୋଟା ସାହିର କୈଳାଶ ସାହୁ(୩୯)ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି ।
ନିମଖଣ୍ଡି ଫାଣ୍ଡି ଅଧୀନ ଲୋଚାପାଡ଼ା ଶ୍ରୀମାନଗରର ୫ ଲେନ୍ରେ ଥିବା ଏକ ଘରେ ନକଲି ଗୁଟ୍ଖା କାରଖାନା ଚାଲୁଥିବା ଖବର ପାଇ ଏସ୍ପିଙ୍କ ନିଦେ୍ର୍ଦଶ କ୍ରମେ ନିମଖଣ୍ଡି ଫାଣ୍ଡି ଅଧିକାରୀ ଜ୍ୟୋତି ରଞ୍ଜନ ବେହେରା, ଏଏସ୍ଆଇ ପି.ସିଏଚ୍ ରଥଙ୍କ ସମେତ ପୁଲିସ ଟିମ୍ ଚଢ଼ଉ କରିଥିଲେ । ଗୁଟ୍ଖା ପ୍ରସ୍ତୁତ କରୁଥିବାବେଳେ ଅଭିଯୁକ୍ତ ଶଙ୍କର କୁମାର ସାହୁ ଓ କୈଳାଶ ସାହୁଙ୍କୁ ଗିରଫ କରି ପୁଲିସ ୧୫ ଲକ୍ଷ ଟଙ୍କାର ବିଭିନ୍ନ କମ୍ପାନୀର ଗୁଟଖା, ମେସିନ ଓ ଗୁଟ୍ଖା ପ୍ରସ୍ତୁତ ସାମଗ୍ରୀ ଜବତ କରିଛି । ଯାଞ୍ଚ ବେଳେ ସେମାନେ ଲାଇସେନ୍ସ ସହ କାଗଜପତ୍ର ଦେଖାଇପାରି ନ ଥିଲେ । ଏନେଇ ଥାନାରେ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ମହେନ୍ଦ୍ର କୁମାର ସାହୁ ସୂଚନା ଦେଇଛନ୍ତି ।
About Author
