ପରୀକ୍ଷା ବେଳେ ସ୍କୁଲ୍ରେ ପଶିଲା ପାଣି
ଧାମନଗର, ୧୭ା୮ (ଆପ୍ର): ସ୍କୁଲରେ ଲହଡ଼ି ମାରୁଛି ବନ୍ୟା ପାଣି । ଫଳରେ ପରୀକ୍ଷା ନ ଦେଇ ଛାତ୍ରଛାତ୍ରୀ ଫେରିଯାଇଛନ୍ତି । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ପରୀକ୍ଷା ବାତିଲ କରାଯାଇଛି । ଭଦ୍ରକ ଜିଲ୍ଲା ଧାମନଗର ବ୍ଲକ୍ କାସିମପୁର ପଞ୍ଚାୟତସ୍ଥ ହେମେନ୍ଦ୍ରନାଥ ହାଇସ୍କୁଲରେ ଫରମେଟିଭ ଆସେସମେଣ୍ଟ ପରୀକ୍ଷା ଥିଲା । ବୁଧବାର ସକାଳେ ଛାତ୍ରଛାତ୍ରୀ ସ୍କୁଲକୁ ଯାଇ ପରୀକ୍ଷା ଦେବାକୁ ବସିଥିବା ବେଳେ ସ୍କୁଲ ଭିତରେ ବନ୍ୟା ପାଣି ପଶିଥିଲା । ତୁରନ୍ତ ପିଲାମାନଙ୍କୁ ସୁରକ୍ଷିତ ଭାବେ ସ୍କୁଲ କ୍ୟାମ୍ପସ ବାହାରକୁ ନିଆଯାଇଥିଲା । ପ୍ରଧାନଶିକ୍ଷକ ପରୀକ୍ଷାକୁ ଅନର୍ଦ୍ଦିଷ୍ଟ କାଳ ପାଇଁ ବାତିଲ କରିଥିଲେ ।
ଭଦ୍ରକ ଜିଲ୍ଲା ଆଖୁଆପଦାରେ ବୈତରଣୀ ବିପଦ ସଙ୍କେତ ଉପରେ ପ୍ରବାହିତ ହେଉଛି । ଫଳରେ ଜିଲ୍ଲାର ତଳିଆ ଅଞ୍ଚଳରେ ବନ୍ୟା ପାଣି ପଶିଛି । ବହୁ ଅଞ୍ଚଳରେ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ତିନିଦିନ ହେଲା ଲୋକେ ଉଚ୍ଚ ସ୍ତାନରେ ଓ ବନ୍ୟା ଆଶ୍ରୟ ସ୍ଥଳରେ ରହିଛନ୍ତି । ପ୍ରଶାସନ ପକ୍ଷରୁ ବନ୍ୟା ଦୁର୍ଗତମାନଙ୍କୁ ରିଲିଫ ଯୋଗାଇ ଦିଆଯାଉଛି ।
About Author
