ସ୍ତ୍ରୀ ମୁହଁରେ ତକିଆ ପକାଇ ହତ୍ୟା
ଚିପ୍ସ ବସ୍ତା ବାନ୍ଧି ପୋଖରୀକୁ ଫିଙ୍ଗିଦେଲା ଶବ
ସୋର (ଆପ୍ର): ସ୍ତ୍ରୀ ମୁହଁରେ ତକିଆ ପକାଇ ମାରିବା ପରେ ଶବର ଗୋଡ଼ ଓ ବେକରେ ଚିପ୍ସ ବସ୍ତା ବାନ୍ଧି ପୋଖରୀକୁ ଫିଙ୍ଗିଦେଲା ସ୍ୱାମୀ । ବାଲେଶ୍ୱର ଜିଲ୍ଲା ସିମୁଳିଆ ଥାନା ବିରଞ୍ଚିପୁରଦରାରେ ଏହି ବୀଭତ୍ସ ହତ୍ୟାକାଣ୍ଡ ଘଟିଛି ।
ଭଦ୍ରକ ଜିଲ୍ଲା ଘଣ୍ଟେଶ୍ୱର ଗାଁର ଧନେଶ୍ୱର ନାୟକ ସିମୁଳିଆ ଥାନା ପାଇତୋରଣା ପଞ୍ଚାୟତ ବିରଞ୍ଚିପୁରଦରାରେ ପତ୍ନୀ ଅନୀତା ଓ ସାନ ପୁଅ ମନୋରଞ୍ଜନ ସହିତ ରହୁଥିଲେ । ବଡ଼ ପୁଅ ଘଣ୍ଟେଶ୍ୱରରେ ରହୁଥିଲେ । ଧନେଶ୍ୱର ମଦ ପିଉ ଥିବାରୁ ଅନେକ ସମୟରେ ଅନୀତାଙ୍କ ସହ କଳି ହେଉଥିଲା । ଗତ ୩ ଦିନ ପୂର୍ବେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଅନୀତା ଶୋଇ ପଡ଼ିବା ପରେ ଧନେଶ୍ୱର ତାଙ୍କ ମୁହଁରେ ତକିଆ ପକାଇ ମାରି ଦେବା ସହିତ ଚିପ୍ସ ବସ୍ତା ବାନ୍ଧି ଶବକୁ ନିକଟରେ ଥିବା ପରିତ୍ୟକ୍ତ ପୋଖରୀରେ ଫିଙ୍ଗି ଦେଇଥିଲା । ଏହାପରେ ଘର ଖୋଲା କରି ପୁଅକୁ ନେଇ ଘଣ୍ଟେଶ୍ୱର ପଳାଇଥିଲା । ଅନୀତାଙ୍କ ସାନ ଭଉଣୀ ବାରମ୍ବାର ଫୋନ୍ କରୁଥିଲେ । ମାତ୍ର କେହି ଫୋନ୍ ଉଠାଉ ନ ଥିବାରୁ ସେ ବିରଞ୍ଚିପୁରଦରା ଯାଇ ଘର ଖୋଲା ପଡ଼ିଥିବା ଦେଖିଥିଲେ । ରବିବାର ସେ ଆଉଥରେ ଫୋନ୍ କରିବାରୁ ମନୋରଞ୍ଜନ ଫୋନ୍ ଉଠାଇ ମାଆକୁ ବାପା ମାରି ଫିଙ୍ଗି ଦେଇଥିବା କହିଥିଲା । ଭଉଣୀଙ୍କଠାରୁ ଖବର ପାଇ ଗାଁ ଲୋକେ ବହୁ ଖୋଜାଖୋଜି ପରେ ପରିତ୍ୟକ୍ତ ପୋଖରୀରୁ ଶବ ଉଦ୍ଧାର କରିଥିଲେ । ଶବର ବେକ ଓ ଗୋଡ଼ରେ ଚିପ୍ସ ବସ୍ତା ବନ୍ଧା ଯାଇଥିଲା । ସିମୁଳିଆ ପୁଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଧନେଶ୍ୱର ଫେରାର ଥିବାରୁ ତାକୁ ଧରିବା ପାଇଁ ପୁଲିସ ଉଦ୍ୟମ ଚଳାଇଛି ।
About Author
