୯୪ ବର୍ଷୀୟା ଭଗବାନୀଙ୍କୁ ସ୍ୱର୍ଣ୍ଣ ପଦକ
ନୂଆଦିଲ୍ଲୀ,୧୧ା୭ (ଏଜେନ୍ସି): ଭାରତୀୟ ଯୁବ ପ୍ରତିଭାମାନେ ସାରା ବିଶ୍ୱର ଖେଳ ପ୍ରତିଯୋଗିତାରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରୁଛନ୍ତି । ମାତ୍ର ଏବେ ୯୪ ବର୍ଷୀୟା ଭଗବାନୀ ଦେବୀ ବିଶ୍ୱ ମାଷ୍ଟର୍ସ ଆଥ୍ଲେଟିକ୍ସ ଚାମ୍ପିଅନ୍ସିପ୍ରେ ସ୍ୱର୍ଣ୍ଣପଦକ ଜିତି ଦେଶବାସୀଙ୍କୁ ଚକିତ କରିଦେଇଛନ୍ତି । ଏହି ଚାମ୍ପିଅନ୍ସିପ୍ରେ ସେ ସ୍ୱର୍ଣ୍ଣପଦକ ବ୍ୟତୀତ ଦୁଇଟି କାଂସ୍ୟ ପଦକ ମଧ୍ୟ ହାସଲ କରିଛନ୍ତି ।
ଫିନ୍ଲାଣ୍ଡର ଟାମ୍ପରେ ଠାରେ ଆୟୋଜିତ ଏହି ଚାମ୍ପିଅନ୍ସିପ୍ରେ ହରିୟାଣାର ଭଗବାନୀ ଦେବୀ ଶହେ ମିଟର ଦୌଡ଼ ଇଭେଣ୍ଟରେ ସମୁଦାୟ ୨୪.୭୪ ସେକେଣ୍ଡରେ ନିଜ ଲକ୍ଷ୍ୟ ହାସଲ କରିଥିଲେ । କେବଳ ଏତିକି ନୁହେଁ, ସଟ୍ପୁଟ୍ରେ ମଧ୍ୟ କାଂସ୍ୟ ପଦକ ଜିତିବାରେ ସଫଳ ହୋଇଛନ୍ତି । ତାଙ୍କର ଏହି ସଫଳତା ନେଇ କ୍ରୀଡ଼ା ମନ୍ତ୍ରଣାଳୟ ଶୁଭେଚ୍ଛା ବାର୍ତ୍ତା ଜଣାଇଛନ୍ତି । ଜାତୀୟ ପତାକା ସହ ପଦକ ଧରି ଭଗବାନୀଙ୍କ ଏକ ଫଟୋ ସୋସିଆଲ୍ ମିଡିଆରେ ଭାଇରାଲ୍ ହେଉଥିବାବେଳେ ବୟସ୍କା ମହିଳାଙ୍କ ଏହି ସାହସିକତାକୁ ବିଭିନ୍ନ ମହଲରେ ଉଚ୍ଚ ପ୍ରଶଂସା କରାଯାଉଛି ।
About Author
