ଟାଟା ହାତରେ ନୀଳାଚଳ ଇସ୍ପାତ
ଭୁବନେଶ୍ୱର, ୪ା୭ (ବୁ୍ୟରୋ): ନୀଳାଚଳ ଇସ୍ପାତ ନିଗମ ଲିମିଟେଡ୍ରୁ ରଣନୀତିକ ପୁଞ୍ଜି ପ୍ରତ୍ୟାହାର ପ୍ରକ୍ରିୟା ଶେଷ ହୋଇଛି । ଏହି ଯୌଥ କମ୍ପାନୀରୁ କେନ୍ଦ୍ର ସରକାରଙ୍କର ଚାରିଟି ଓ ଓଡିଶା ସରକାରଙ୍କ ଦୁଇଟି ସରକାରୀ ଉଦ୍ୟୋଗ ସେମାନଙ୍କର ୯୩.୭୧% ଅଂଶଧନକୁ କ୍ରେତା ଟାଟା ଷ୍ଟିଲ ଲଙ୍ଗ୍ ପ୍ରଡକ୍ଟସ ଲିମିଟେଡ୍କୁ ହସ୍ତାନ୍ତର କରିଛନ୍ତି । ଭୁବନେଶ୍ୱରରେ କେନ୍ଦ୍ର ଅର୍ଥ ମନ୍ତ୍ରଣାଳୟ ଅନ୍ତର୍ଗତ ଡିଆଇପିଏମ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଏହି ତଥ୍ୟ ପ୍ରଦାନ କରାଯାଇଛି ।
ଏ ବାବଦରେ ସମ୍ପୃକ୍ତ ଟାଟା କମ୍ପାନୀ ନୀଳାଚଳ ଇସ୍ପାତ ନିଗମର ଅଂଶୀଦାରମାନଙ୍କୁ ଏଣ୍ଟରପ୍ରାଇଜ ଭ୍ୟାଲୁଭାବେ ମୋଟ ୧୨, ୧୦୦ କୋଟି ଟଙ୍କା ପ୍ରଦାନ କରିଛି । ଅଂଶଧନ କ୍ରୟ ରାଜିନାମାର ସର୍ତ୍ତ ଅନୁସାରେ ଏହି ଅର୍ଥ କର୍ମଚାରୀଙ୍କ ପ୍ରାପ୍ୟ ପ୍ରଦାନ, କାର୍ଯ୍ୟ ପରିଚାଳନା ପାଇଁ ଋଣ ପ୍ରଦାନକାରୀ, ଆର୍ଥିକ ଋଣଦାତା, ବିକ୍ରେତାଙ୍କ ପ୍ରାପ୍ୟ ଏବଂ ଅଂଶପତ୍ରଧାରୀ ବିକ୍ରେତାଙ୍କ ଇକ୍ୱିଟି ସକାଶେ ଖର୍ଚ୍ଚ କରାଯାଇଛି । ଏହି ଇସ୍ପାତ ପ୍ରକଳ୍ପ ବିକ୍ରୟ ପାଇଁ ଯେଉଁ ନିଲାମ ୨୦୨୨ଜାନୁୟାରୀ ୩୧ରେ ହୋଇଥିଲା ସେଥିରେ ଟାଟା କମ୍ପାନୀ (ଟାଟା ଷ୍ଟିଲ ଲଙ୍ଗ ପ୍ରଡକ୍ଟ ଲିମିଟେଡ) ସର୍ବାଧିକ ଅର୍ଥ ଦେବାର ପ୍ରସ୍ତାବ ଦେଇଥିଲା । ଏହାପରେ ଏହି କମ୍ପାନୀକୁ ୨୦୨୨ ଫେବ୍ରୁଆରୀ ୨ତାରିଖରେ ଲେଟର ଅଫ ଆୱାର୍ଡ ପ୍ରଦାନ କରାଯାଇଥିଲା । ଏହାପରେ ଅଂଶଧନ କ୍ରୟ ଚୁକ୍ତି (ଏସପିଏ) ସ୍ୱାକ୍ଷରିତ ହୋଇଥିଲା ୨୦୨୨ମାର୍ଚ୍ଚ ୧୦ ତାରିଖରେ । ଏହାପରେ ଷ୍ଟ୍ରାଟେଜିକ୍ ପାର୍ଟନର ଏନ୍ଆଇଏନ୍ଏଲ୍ ଓ ଛଅଟି ଅଂଶପତ୍ର ବିକ୍ରେତା ଏସପିଏର ସର୍ତ୍ତ ପୂରଣ କରିବାକୁ ବୁଝାମଣା ଦିଗରେ କାମ ଆରମ୍ଭ କରିଥିଲେ । ଏଥିରେ ଅପେରସନାଲ କ୍ରେଡିଟରଙ୍କ ପ୍ରାପ୍ୟ, କର୍ମଚାରୀଙ୍କ ପ୍ରାପ୍ୟ, ବିକ୍ରେତାଙ୍କ ଅପରେସନାଲ ସ୍ୱ ପୃଷ୍ଠା: ୫
ଟାଟା ହାତରେ…
ପ୍ରାପ୍ୟ ଏବଂ ବିକ୍ରେତାଙ୍କ ଆର୍ଥିକ ପ୍ରାପ୍ୟ ଆଦି ଦେବାର ବ୍ୟବସ୍ଥା ଚୂଡାନ୍ତ ହୋଇଥିଲା । ଉଭୟପକ୍ଷଙ୍କ ସନ୍ତୋଷ ମୁତାବକ ଏହି ସର୍ତ୍ତ ପାଳନ କରାଯାଇଛି ।
ନୀଳାଚଳ ଇସ୍ପାତ ନିଗମ ଲିମିଟେଡ (ଏନ୍ଆଇଏନ୍ଏଲ) ଚାରିଟି କେନ୍ଦ୍ରୀୟ ରାଷ୍ଟ୍ରାୟତ ଉଦ୍ୟୋଗର ମିଳିତ ସହଯୋଗରେ ପ୍ରତିଷ୍ଠା ହୋଇଥିଲା । ଏଥିରେ ଏମ୍ଏମ୍ଟିସିର ୪୯.୭୮%, ଏନ୍ଏମ୍ଡିସିର ୧୦.୧୦%, ବିଏଚ ଇଏଲର ୦.୬୮% ଓ ମିକନର ୦.୬୮ ଶତାଂଶ ଅଂଶଧନ ଥିଲା । ଏହାଛଡା ଓଡିଶା ସରକାରଙ୍କ ଦୁଇଟି ସରକାରୀ ଉଦ୍ୟୋଗ ମଧ୍ୟ ଏଥିରେ ପୁଞ୍ଜିନିବେଶ କରିଥିଲେ । ସେଥିମଧ୍ୟରୁ ଓଏମ୍ସିର ଅଂଶ ଏନ୍ଆଇଏନ୍ଏଲରେ ୨୦.୪୭ ଶତାଂଶ ଥିବାବେଳେ ଇପିକଲର ଅଂଶ ଥିଲା ୧୨. ୦୦ ଶତାଂଶ ।
About Author
