ଚଢ଼ିଗଲା ଟ୍ରକ୍, ୩ ମୃତ
ବାରିପଦା, ୧୮ା୪(ଆପ୍ର): ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ୪୯ନଂ ଜାତୀୟ ରାଜପଥ ନୂଆଗାଁ ଛକରେ ଭାରସାମ୍ୟ ହରାଇ ରାସ୍ତାକଡ଼ରେ ଠିଆ ହୋଇଥିବା ୪ଜଣଙ୍କ ଉପରେ ଚଢି ଯାଇଥିଲା । ଫଳରେ ଘଟଣାସ୍ଥଳରେ ୩ ଜଣଙ୍କ ମୃତୁ୍ୟ ହୋଇଥିବା ବେଳେ ଜଣେ ଗୁରୁତର ହୋଇ ବାରିପଦା ଜିଲ୍ଲା ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି ।
ସୂଚନାନୁସାରେ, ରବିବାର ରାତି ପ୍ରାୟ ସାଢ଼େ ୧୨ଟାରେ ଏଭଳି ଦୁଃଖଦ ମର୍ମନ୍ତୁଦ ଦୁର୍ଘଟଣା ଘଟିଛି । ଝାରପୋଖରିଆ ଥାନା ଅନ୍ତର୍ଗତ ପଳାଶବଣି ଗ୍ରାମର ସୁକୁରା ମାହାଲି (୫୦), ବାଙ୍ଗିରିପୋଷି ଥାନା କଦମଡିହି ଗ୍ରାମର ସାଲଖାନ ହାଁସଦା, ବେଢ଼ାକୁଦର ଗ୍ରାମର ସୁଶାନ୍ତ ମହାନ୍ତ ଏବଂ ସିଲିଫୋଡି ଗ୍ରାମର ଦୁର୍ଗା ନାଏକ ଅଙ୍ଗାରପଦା ହାଟରୁ ଫେରି ନୁଆଗାଁ ରାସ୍ତା କଡ଼ରେ ବୋଲେରୋ ରଖି ଛିଡା ହୋଇଥିଲେ । ଏହି ସମୟରେ ଗୋଟିଏ ଟ୍ରକ୍ ଦୃତ ଗତିରେ ଆସି ଭାରସାମ୍ୟ ହରାଇ ସେମାନଙ୍କ ଉପରେ ଚଢ଼ିଯାଇ ଓଲଟି ପଡ଼ିଥିଲା । ଏହି ଦୁର୍ଘଟଣାରେ ସୁକୁରା ମାହାଲି, ସାଲଖାନ ହାଁସଦା ଏବଂ ସୁଶାନ୍ତ ମହାନ୍ତଙ୍କ ଘଟଣାସ୍ଥଳରେ ମୃତୁ୍ୟ ହୋଇଥିବା ବେଳେ ଦୁର୍ଗା ନାଏକ ଗୁରୁତର ଆହତ ହୋଇଥିଲେ । ତେବେ ଦୁର୍ଘଟଣା ଘଟାଇ ଟ୍ରକର ଡ୍ରାଇଭର ଓ ହେଲପର ଫେରାର୍ ହୋଇଥିବା ଜଣାପଡିଛି । ଖବର ପାଇ ବିଶୋଇ ଥାନା ଅଧିକାରୀ ଅନିନ୍ଦ୍ୟ ଭୂଷଣ ନାଏକ ଘଟଣାସ୍ଥଳରେ ପହଞ୍ଚି ମୃତକ ଓ ଆହତଙ୍କୁ ରାଇରଙ୍ଗପୁର ହସ୍ପିଟାଲ ପଠାଇଥିଲେ । ଏନେଇ ବିଶୋଇ ପୁଲିସ ସୋମବାର ୬୦/୨୨ରେ ଏକ ମାମଲା ରୁଜୁ କରି ମୃତକଙ୍କ ଶବ ବ୍ୟବଚ୍ଛେଦ କରି ପରିବାରବର୍ଗଙ୍କୁ ହସ୍ତାନ୍ତର କରିଛି ।
About Author
