ମଦଭାଟି ଭାଙ୍ଗିଲେ ମହିଳା, ୩ ଅଟକ
ଚୌଦ୍ୱାର(ଆପ୍ର): ଚୌଦ୍ୱାର ପୌରପାଳିକା ୧୭ ନମ୍ବର ୱାର୍ଡ଼ ଅନ୍ତର୍ଗତ ନୂଆସାହି ଗା୍ରମରେ ଏକ ବେଆଈନ୍ ମଦ ଭାଟିକୁ ସ୍ଥାନୀୟ ମହିଳା ମାନେ ରବିବାର ସଂଧ୍ୟାରେ ଯୋର ଜବରଦସ୍ତ ଭାଙ୍ଗି ଦେଇଛନ୍ତି । ଦୀର୍ଘ ୩୦ବର୍ଷଧରି ଚାଲିଥିବା ଏହି ମଦଭାଟିରୁ ମଦପିଇ ଏହି ୱାର୍ଡ଼ ସହିତ ଆଖପାଖ ୱାର୍ଡ଼ର ଲୋକମାନେ ନିୟମିତ ମଦ୍ୟପାନ କରି ନିଶାଶକ୍ତ ହେବା ସହିତ ପରିବାରରେ ଅଶାନ୍ତିର କାରଣ ସାଜିଥିଲେ । ମଦ୍ୟପ ମାନେ ରୋଜଗାର କରୁଥିବା ଅର୍ଥକୁ ପରିବାରକୁ ନଦେଇ ମଦ ଭାଟିରେ ଉଡ଼ାଉଥିବା ଏବଂ ରାତିରେ ଘରକୁ ନଯାଇ ମଦଭାଟିରେ ଶୋଉଥିବା ସ୍ଥାନୀୟ ମହିଳାମାନେ ଅଭିଯୋଗ କରିଛନ୍ତି । ଏହି ମଦଭାଟି ପାଇଁ ଅନେକ ପରିବାର ସର୍ବସ୍ୱାନ୍ତ ହୋଇ ଯାଇଥିବା ଏବଂ ଏଥିପାଇଁ ଅନେକ ପରିବାରରେ ଝଗଡ଼ା, ମାଡ଼ପିଟ ତଥା ଗଣ୍ଡଗୋଳ ଲାଗି ରହୁଥିବାଦେଖିବାକୁ ମିଳୁଛି । ପରିସ୍ଥିତ ଅସମ୍ଭାଳ ହେବାରୁ ସାହିର ଶତାଧିକ ମହିଳା ଏସମ୍ପର୍କରେ ନବ ନିର୍ବାଚିତ କାଲନସିଲର ଆଶୁତୋଷ ଦାସଙ୍କୁ ଜଣାଇବା ସହିତ ରବିବାର ସଂଧ୍ୟାରେ ଏକାଠି ହୋଇ ହାତରେ ବାଡ଼ିଠେଙ୍ଗା ଧରି ମଦ ଭାଟି ଆଡ଼କୁ ମାଡ଼ି ଯାଇଥିଲେ । ମଦଭାଟି ମାଲିକ ମାଟିତଳେ ପୋତି ରଖିଥିବା ବିପୁଳ ପରିମାଣର ଆସ୍କାଫଟି ମଦ ବୋତଲକୁ ମହିଳାମାନେ ବାହାର କରିବା ସହିତ ଭାଟି ମାଲିକ କୁହା ଯାଉଥିବା ପରଜାପତି ନାୟକ ନାମ୍ନି ଜଣେ ମହିଳା ଓ ତା ସହଯୋଗୀ ଅନ୍ୟ ୨ ମହିଳାଙ୍କୁ କାବୁ କରି ନିସ୍ତୁକମାଡ଼ ମାରିଥିଲେ । ଖବରପାଇ କାଉନ୍ସିଲର ଶ୍ରୀ ଦାସ ଘଟଣାସ୍ଥଳରେ ପହଞ୍ଚି ପୁଲିସକୁ ଖବର ଦେଇଥିଲେ । ଚୌଦ୍ୱାର ପୋଲିସ ଘଟଣାସ୍ଥଳରେ ପହଞ୍ଚି ମଦକୁ ଜବତ କରିବା ସହିତ ପରଜାପତି ଓ ଦୁଇ ସହଯୋଗୀ ମହିଳାଙ୍କୁ ଥାନାକୁ ଆଣି ଅଟକ ରଖିଛି ।
About Author
