ଭାରତ ପୁଲ୍ ଟପ୍ପର
ପୋଚେଫ୍ଷ୍ଟ୍ରମ୍, ୫ା୪ (ଏଜେନ୍ସି): ମମତାଜ ଖାଁଙ୍କ ହାଟ୍ରିକ୍ ଗୋଲ୍ ସହାୟତାରେ ଭାରତୀୟ ଟିମ୍ ମଙ୍ଗଳବାର ଏଫ୍ଆଇଏଚ୍ ମହିଳା କନିଷ୍ଠ ବିଶ୍ୱକପ୍ରେ ମାଲେସିଆକୁ ୪-୦ରେ ହରାଇ ପୁଲ୍ ପର୍ଯ୍ୟାୟରେ ଅପରାଜେୟ ରହିବା ସହ ଟପ୍ପର ହୋଇଛି । ଭାରତ ଶୁକ୍ରବାର କ୍ୱାର୍ଟର୍-ଫାଇନାଲ୍ରେ ଦକ୍ଷିଣ କୋରିଆକୁ ଭେଟିବ ।
ପ୍ରଥମ ଦୁଇଟି ମ୍ୟାଚ୍ ଜିତି କ୍ୱାର୍ଟର୍-ଫାଇନାଲ୍ରେ ପ୍ରବେଶ କରି ସାରିଥିବା ଭାରତୀୟ ଟିମ୍ କ୍ରମାଗତ ତୃତୀୟ ବିଜୟ ହାସଲ କରିଥିଲା । ଟିମ୍ ପକ୍ଷରୁ ମମତାଜ (୧୦ମ, ୨୬ତମ, ୫୯ତମ ମିନିଟ୍) ତିନିଟି ଓ ସଙ୍ଗୀତା କୁମାରୀ (୧୧ତମ) ଗୋଟିଏ ଗୋଲ୍ ସ୍କୋର୍ କରିଥିଲେ । ଭାରତ ପୁଲ୍-ଡି’ରେ ତିନିଟି ମ୍ୟାଚ୍ରୁ ନଅ ପଏଣ୍ଟ ପାଇଛି ।
ଭାରତ ଏଥି ପୂର୍ବରୁ ୱେଲ୍ସକୁ ୫-୧ ଓ ଜର୍ମାନୀକୁ ୨-୧ରେ ମାତ୍ ଦେଇଥିଲା । ଏହି ଦୁଇ ବିଜୟ ଓ ନକ୍ଆଉଟ୍ରେ ପ୍ରବେଶ ପରେ ଭାରତୀୟ ଖେଳାଳିଙ୍କ ମନୋବଳ ଏକ ଭିନ୍ନ ସ୍ତରରେ ପହଞ୍ଚିଛି । ମାଲେସିଆ ବିପକ୍ଷ ମ୍ୟାଚ୍ରେ ଭାରତୀୟ ଟିମ୍ର ସମ୍ପୂର୍ଣ୍ଣ ଆଧିପତ୍ୟ ରହିଥିଲା । ୧୦ମ ମିନିଟ୍ରେହିଁ ଜୋର୍ଦାର ଆରମ୍ଭର ଫଳ ମିଳିଥିଲା । ସୁଯୋଗ ଅପେକ୍ଷାରେ ଥିବା ମମତାଜ ଗୋଲ୍ ନିକଟରୁ ଏକ ଚିତ୍ତାକର୍ଷକ ସ୍କୋର୍ କରିଥିଲେ । ଏହାର ଏକ ମିନିଟ୍ ପରେ ଭାରତର ଅଗ୍ରଣୀ ଦ୍ୱିଗୁଣିତ ହୋଇଥିଲା । ସଙ୍ଗୀତା ଲାଲରିଣ୍ଡିକୀଙ୍କ କ୍ରସ୍ରୁ ଗୋଲ୍ କରିଥିଲେ । ଏହାପରେ ଭାରତ ଦୁଇଟି ପେନାଲ୍ଟି କର୍ଣ୍ଣର ହାସଲ କରିଥିଲେହେଁ ତାହା କାମରେ ଆସି ନ ଥିଲା । ୨୬ତମ ମିନିଟ୍ରେ ମମତାଜ ଆଉ ଏକ ଗୋଲ୍ ଦେବା ଫଳରେ ଭାରତ ମଧ୍ୟାନ୍ତର ସୁଦ୍ଧା ୩-୦ରେ ଅଗ୍ରଣୀ ରହିଥିଲା ।
ଲାଲରିଣ୍ଡିକୀ ଉତ୍ତମ ଖେଳ ପ୍ରଦର୍ଶନ କରିଥିଲେ । ସେ କେବଳ ଗୋଲ୍ ସୁଯୋଗ ସୃଷ୍ଟି କରି ନ ଥିଲେ ମାଲେସିଆ ଗୋଲ୍ପୋଷ୍ଟ ପାଇଁ ଆତଙ୍କ ସୃଷ୍ଟି କରିଥିଲେ । ତୃତୀୟ କ୍ୱାର୍ଟରରେ ଭାରତ କେତେକ ପିସି ପାଇଥିଲେହେଁ ସେଗୁଡ଼ିକ ଚୂଡ଼ାନ୍ତ ରୂପ ନେଇ ପାରି ନ ଥିଲା ।
ଚତୁର୍ଥ କ୍ୱାର୍ଟରରେ ମ୍ୟାଚ୍ ଶେଷ ହେବାକୁ ୧୦ ମିନିଟ୍ ବାକି ଥିବା ବେଳେ ମାଲେସିଆ ଦୁଇଟି ପିସି ହାସଲ କରିଥିଲା, କିନ୍ତୁ ଭାରତର ଦ୍ୱିତୀୟ ଗୋଲ୍କିପର୍ ଖୁସ୍ବୁ ଚମକପ୍ରଦ ସେଭ୍ କରିଥିଲେ । ଏହାପରେ ଭାରତ ସପ୍ତମ ପିସି ପାଇଥିଲା, ହେଲେ ମାଲେସୀୟ ଗୋଲ୍କିପର୍ ଏବି ମଶିତା ଏହାକୁ ଅଟକାଇ ଦେଇଥିଲେ । ଫାଇନାଲ ହୁଟର୍କୁ ଏକ ମିନିଟ୍ ଥିବା ବେଳେ ଡୁଙ୍ଗଡୁଙ୍ଗଙ୍କ ପାସ୍ରେ ମମତାଜ ବ୍ୟକ୍ତିଗତ ତୃତୀୟ ଓ ଟିମ୍ ପକ୍ଷରୁ ଚତୁର୍ଥ ଗୋଲ୍ ଦେଇଥିଲେ ।
About Author
