ମା’ଙ୍କୁ ଜୀବନ୍ତ ସମାଧି ଉଦ୍ୟମ: ପୁଅ ଅଟକ
ଦଶରଥପୁରରେ ଅଭାବନୀୟ ଘଟଣା
ଦଶରଥପୁର(ଆପ୍ର): ଦଶରଥପୁର ବ୍ଲକ୍ରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଜନ୍ମ କରିଥିବା ମା’ କୁ ଜମିବାଡି ଓ ସମ୍ପତ୍ତିପାଇଁ ଇଟାରେ ପୋତି ପୁଅ ଜୀବନ୍ତ ସମାଧି ଦେବାକୁ ଉଦ୍ୟମ କରିଥିବା ନେଇ ମଙ୍ଗଳପୁର ଥାନାରେ ଲିଖିତ ଅଭିଯୋଗ ହୋଇଛି । ପୁଲିସ ଦୁଇଟି ମାମଲା ରୁଜୁକରିଥିବା ମିଳିଛି ।
ମଙ୍ଗଳପୁର ଥାନା ଦତ୍ତପୁର ଗାଁର ମଖି ବେହେରାଙ୍କର ୪ ପୁଅ । ଜମିବାଡିକୁ କେନ୍ଦ୍ରକରି ଅଧିକାଂଶ ସମୟ ସେମାନଙ୍କ କଳିତକରାଳରେ ବିତେ । ରବିବାର ଜମି ଭାଗବଣ୍ଟାକୁ କେନ୍ଦ୍ରକରି ତୃତୀୟ ପୁତ୍ର ରଘୁନାଥ ଓ ବୋହୂ ମଧୁସ୍ମିତା ମିଶି ମଖିଙ୍କୁ ଇଟାଦ୍ୱାରା ଆବଦ୍ଧକରି ଜୀବନ୍ତ ସମାଧି ଦେବାକୁ ଉଦ୍ୟମ କରିଥିଲେ । ମଖି ଓ ଦୁଇ ବୋହୂ ନୟନା ବେହେରା ଏବଂ ଅନିତା ସୂଚନା ଦେଇଛନ୍ତି ।
ରଘୁନାଥ ଏବଂ ମଧୁସ୍ମିତା ନାମରେ ମଖି ଏତଲା ଦେଇଛନ୍ତି । ତେବେ ମଧୁସ୍ମିତା ଶାଶୂ ଏବଂ ସାନ ପୁଅ ବୋହୂଙ୍କ ବିରୋଧରେ ପାଲଟା ଅଭିଯୋଗ କରିଛନ୍ତି । ପୁଲିସ ୨ ଟି ମାମଲା ରୁଜୁ କରିଛି । ଥାନା ଅଧିକାରୀ ଏନ୍ନାମାମୁଲ୍ ହକ୍ଙ୍କୁ ପଚାରିବାରେ ଜମି ଭାଗବଣ୍ଟାକୁ କେନ୍ଦ୍ରକରି ଭାଇ ଭାଇ ମଧ୍ୟରେ ଝଗଡା ହୋଇଛି । ପୁଲିସ ତଦନ୍ତ କରି ୨ ମାମଲା ରୁଜୁକରିଛି ।
About Author
