ଫାଙ୍କା ଗୁଳି ଫୁଟାଇ ଲୁଟ୍ପାଟ୍
କଟକ, ୬ା୯(ବୁ୍ୟରୋ): ପାର୍ବଣ ପାଖେଇ ଆସୁଥିବା ବେଳେ ଭାଇଚାରାର ସହର କଟକରେ ମାତିଲେଣି ଦୁର୍ବୃତ୍ତ । ଦିନ ଦିପ୍ରହରରେ ବିଚ୍ ରାସ୍ତାରେ ଜଣେ ବ୍ୟବସାୟୀଙ୍କ ଉପରକୁ ଫାଙ୍କା ଗୁଳି ଚଳାଇ ତାଙ୍କଠୁ ୫ ଲକ୍ଷ ଟଙ୍କା ମୂଲ୍ୟର ସୁନା ଗହଣା ସହ ୨୫ ହଜାର ଟଙ୍କା ଲୁଟି ନେଇ ଦୁର୍ବୃତ୍ତମାନେ ଫେରାର ହୋଇଯାଇଛନ୍ତି । ସୌଭାଗ୍ୟବଶତ ବ୍ୟବସାୟୀ ଜଣଙ୍କ ବର୍ତ୍ତି ଯାଇଥିବା ବେଳେ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏପରି ଘଟଣା ଆଜି ସକାଳେ କଟକର ମତ୍ତଗଜପୁର ଲେବୁଲ କ୍ରସିଂ ନିକଟରେ ଘଟିଛି ।
ପୁଲିସ୍ ସୂଚନା ଅନୁଯାୟୀ, ମତ୍ତଗଜପୁରରେ ବ୍ୟବସାୟ କରୁଥିବା ହାଟସାହିର ଜଣେ ବ୍ୟବସାୟୀ ଆଜି ସକାଳେ ଘରୁ ବାହାରିଥିଲେ । ଘର ନିକଟରୁ ତାଙ୍କୁ କିଛି ଯୁବକ ପିଛା କରି ଲେଭଲ କ୍ରସିଂ ନିକଟରେ ନିଛାଟିଆ ସ୍ଥାନ ଦେଖି ୩ଟି ବାଇକରେ ଆସିଥିବା ୫/୬ ଦୁର୍ବୃତ୍ତ ସମ୍ପୃକ୍ତ ବ୍ୟବସାୟୀଙ୍କୁ ଘେରି ଯାଇଥିଲେ । ଏହାପରେ ସେମାନେ ତାଙ୍କୁ ସବୁ ସୁନା, ଅଳଙ୍କାର ଓ ଟଙ୍କା ଦେଇ ଦେବାକୁ ଧମକ ଦେଇଥିଲେ । ମାତ୍ର ବ୍ୟବସାୟୀଜଣକ ଦୁର୍ବୃତ୍ତମାନଙ୍କୁ ରୋକଠୋକ ମନା କରି ଦେବାରୁ ଉଭୟ ପକ୍ଷ ମଧ୍ୟରେ ଧସ୍ତାଧସ୍ତି ହୋଇଥିଲା । ଏଥିରେ ଉତ୍ଷିପ୍ତ ହୋଇ ଦୁର୍ବୃତ୍ତମାନେ ବ୍ୟବସାୟୀଙ୍କ ଉପରକୁ ଗୁଳି ଚଳାଇଥିଲେ । ମାତ୍ର ଭାଗ୍ୟବଶଃତ ତାହା ବ୍ୟବସାୟୀଙ୍କ ଶରୀରରେ ବାଜି ନ ଥିଲା । ଏଥିଯୋଗୁ ସେ ଭୟଭୀତ ହୋଇ ପଡ଼ିଥିବା ବେଳେ ଦୁର୍ବୃତ୍ତମାନେ ତାଙ୍କ ନିକଟରେ ଥିବା ୨୫ ହଜାର ଟଙ୍କା ଓ ସୁନା, ଅଳଙ୍କାର ନେଇ ଫେରାର ହୋଇ ଯାଇଥିଲେ । ବ୍ୟକ୍ତିଜଣକ ସୁରକ୍ଷିତ ଥିବା ଜଣାଯାଇଛି । ତେବେ ଏହି ଖବର ପାଇ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏଥିସହ ଘଟଣାସ୍ଥଳରୁ ଖୋକା ଓ ଗୁଳି ଜବତ ହୋଇଥିବା ଜଣାଯାଇଛି । ଅପରାଧୀଙ୍କୁ ଧରିବାକୁ ପୁଲିସ ସ୍ୱତନ୍ତ୍ର ଟିମ୍ ଗଠିତ ହୋଇଥିବା ବେଳେ ସ୍ପେଶାଲ ସ୍କ୍ୱାଡ ବି ଘଟଣା ଉପରେ ନଜର ରଖିଛି । ପୁଲିସ୍ ସ୍ଥାନୀୟ ଅଞ୍ଚଳର ସିସିଟିଭି ଫୁଟେଜ ଦେଖି ତଦନ୍ତ ଜାରି ରଖିଛି ।
About Author
