ଶ୍ରମିକ ଓ ମାଲିକ ମୃତ
କୂଅ ସଫାକରିବା ବେଳେ ଅଘଟଣ
ପରଜଙ୍ଗ, ୨୧ା୭ (ଆପ୍ର): ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ସରକିଶୋରପାଳ ଗ୍ରାମର ଏକ ଅଭାବନୀୟ ଘଟଣାକୁ ନେଇ ସାରା ଅଞ୍ଚଳରେ ଶୋକର ଛାୟା ଖେଳିଯାଇଛି । ସରକିଶୋରପୁର ଗ୍ରାମର ଘରମାଲିକ ଶଶି ଭୂଷଣ ସାହୁ ନିଜ ବାଡିରେ ଥିବା କୂଅ ସଫା କରିବା ଏବଂ ବ୍ଲିଚିଂ ପାଉଡର ପକାଇବା ପାଇଁ ଶ୍ରମିକ ଭଜମନ ବେହେରାଙ୍କୁ ଡାକିଥିଲେ । କୂଅଟି ୪୦ଫୁଟ ଗଭୀର ହୋଇଥିବା ବେଳେ କୂଅରେ ପଶି ସଫା କରୁଥିବାବେଳେ ହଠାତ ଭଜମନ କୂଅରେ ଖସିପଡିଥିଲେ । ଶ୍ରମିକ ଜଣକ କୂଅରେ ପଡିଯିବା ଦେଖିମାଲିକ ଶଶି ଭୂଷଣ କୂଅରେ ପ୍ରବେଶ କରିଥିଲେ । କିନ୍ତୁ କୂଅରୁ ସେ ଫେରିନଥିଲେ । ଏକଥା ପରିବାର ଲୋକ ଜାଣି ପାରି ତୁରନ୍ତ ପରଜଙ୍ଗ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗର କର୍ମଚାରୀମାନେ ଘଟଣା ସ୍ଥଳରେ ପହଞ୍ଚ କୂଅରୁ ଉଭୟଙ୍କୁ ଉଦ୍ଧାର କରି ପରଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଏହି ଘଟଣାକୁ ନେଇ ଗ୍ରାମରେ ଶୋକର ଛାୟା ଖେଳିଯାଇଛି ।
About Author
