ହୋମ୍ଗାର୍ଡଙ୍କୁ ଗାଡ଼ି ଚଢ଼ାଇ ମାରିଦେଲେ
ଆର୍ଟିଓ ଯାଞ୍ଚ ବେଳେ ଅଘଟଣ
କେନ୍ଦ୍ରାପଡ଼ା (ଆପ୍ର): କେନ୍ଦ୍ରାପଡ଼ା ପରିବହନ ବିଭାଗ ପକ୍ଷରୁ ଯାନବାହନ ଯାଞ୍ଚ ସମୟରେ ଗାଡ଼ି ଧକ୍କାରେ ଜଣେ ହୋମ୍ଗାର୍ଡ ପ୍ରାଣ ହରାଇଛନ୍ତି । ଚଣ୍ଡିଖୋଲ-ପାରାଦ୍ୱୀପ ୫୩ ନଂ ଜାତୀୟ ରାଜପଥର ବଳଭଦ୍ରପୁର ନିକଟରେ ବୁଧବାର ସକାଳ ୬ଟାରେ ଓଭର୍ଲୋଡିଂ ଗାଡିଗୁଡ଼ିକ ଯାଞ୍ଚ ଚାଲିଥିଲା । ଏକ ପିକ୍ଅପ୍ ଭାରସାମ୍ୟ ହରାଇ ଯାଞ୍ଚରେ ନିୟୋଜିତ ହୋମ୍ଗାର୍ଡ ପ୍ରବୀଣ ମହାପାତ୍ରଙ୍କ ଉପରେ ମାଡିଯିବାରୁ ଘଟଣାସ୍ଥଳରେ ତାଙ୍କର ମୃତୁ ଘଟିଥିଲା ।
ସୂଚନାଯୋଗ୍ୟ, ଘନ କୁହୁଡି ସାଙ୍ଗକୁ ଅନ୍ଧାରୁଆ ସମୟରେ ଆର୍ଟିଓ ପକ୍ଷରୁ ଯାଞ୍ଚ ଚାଲିଥିବା ସମୟରେ ଏହି ଦୁର୍ଘଟଣା ଘଟିଛି । ପ୍ରବୀଣ ଦୀର୍ଘଦିନ ଧରି ପରିବହନ ବିଭାଗରେ ଦାୟିତ୍ୱ ନିର୍ବାହ କରି ଆସୁତôଲେ । ହେଲେ ପରିତାପର ବିଷୟ, ଦୁର୍ଘଟଣା ପରେ ଯାଞ୍ଚ କରୁଥିବା ଅନ୍ୟ କର୍ମଚାରୀମାନେ ପ୍ରବୀଣଙ୍କୁ ମେଡିକାଲ ନେବା ବଦଳରେ ସେଠାରୁ ଚମ୍ପଟ୍ ମାରିଥିବା ଲୋକେ ଅଭିଯୋଗ କରିଛନ୍ତି ।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଥିଲା । ପୁଲିସ ପହଞ୍ଚି ପରିସ୍ଥିତି ଆୟତ୍ତ କରିଥିଲା । ଦୁର୍ଘଟଣା ଘଟାଇଥିବା ଗାଡିର ଡ୍ରାଇଭର ଫେରାର ହୋଇଯାଇଛି । ପୁଲିସ ପିକ୍ଅପ୍କୁ ଜବତ କରିବା ସହ ଶବ ବ୍ୟଚ୍ଛେଦ କରାଇ ତଦନ୍ତ ଚଳାଇଛି । ଦୁର୍ଘଟଣା ପଛରେ ବିଭିନ୍ନ କଥା ସାମ୍ନାକୁ ଆସିଛି । ଯାଞ୍ଚ ଆଳରେ ଲୋକଙ୍କୁ ନାନାଦି ହଇରାଣ କରାଯାଉଥିଲା ବୋଲି ଅଭିଯୋଗ ହୋଇଛି ।
About Author
