ଦୋକାନକୁ ମାଡ଼ିଗଲା ଟ୍ରକ୍
କଟକ, ୧୦ା୧୨ (ବୁ୍ୟରୋ): ଜଗତପୁର ଥାନା ଅନ୍ତର୍ଗତ ଖଇରା ପୋଲ ନିକଟରେ ମର୍ମନ୍ତୁଦ ଦୁର୍ଘଟଣା ଘଟିଛି । ଜଣେ ଫଳ ବ୍ୟବସାୟୀଙ୍କ ଦୋକାନ ଉପରକୁ ଏକ ୧୪ ଚକିଆ ଟ୍ରକ ମାଡିଯାଇଛି । ଫଳରେ ଘଟଣାସ୍ଥଳରେ ଦୋକାନୀ ମାଲିକ ସମେତ ୮ ଜଣ ଗୁରୁତର ଆହତ ହୋଇଛନ୍ତି । ଗୁରୁତର ଅବସ୍ଥାରେ କଟକ ବଡ଼ ଡ଼ାକ୍ତରଖାନାକୁ ନିଆଯାଇଥିଲା । ସେଠାରେ ଚିକିତ୍ସିତ ଅବସ୍ଥାରେ ନିଶ୍ଚିନ୍ତକୋଇଲି ଅଞ୍ଚଳର ଜଣେ ବ୍ୟକ୍ତି ମୃତୁ୍ୟ ଘଟିଥିବା ଜଣାପଡିଛି । ମୃତକ ହେଉଛନ୍ତି ଫଳ ଦୋକାନରେ କାମ କରୁଥିବା ସୁବାସ ସାହୁ । ଏହି ଦୁର୍ଘଟଣାରେ ୫ ବାଇକ୍ ଓ ୨ କାର୍ ଭାଙ୍ଗି ଚୁରମାର୍ ହୋଇଯାଇଛି । ଦୁର୍ଘଟଣା ଘଟିବା ପରେ ଉକ୍ତ ରାସ୍ତାଟି ଦୀର୍ଘ ସମୟ ଧରି ଜାମ୍ ରହିବାରୁ ପୁଲିସ ଭିଡ ନିୟନ୍ତ୍ରଣ କରିବାକୁ ନାକେଦମ୍ ହୋଇପଡିଥିଲା । ସୂଚନା ମୁତାବକ,ଖଇରା ପୋଲ ନିକଟରେ ସଞ୍ଜୟ ସାହୁ ନାମକ ଜଣେ ବ୍ୟବସାୟୀ ଦୀର୍ଘବର୍ଷ ଧରି ରାସ୍ତାକୁ ଲାଗି ଫଳ ଦୋକାନ କରିଛନ୍ତି । ଗ୍ରାହକମାନଙ୍କ ନିମନ୍ତେ ପାର୍କିଂ ସୁବିଧା ନ ଥିବାରୁ ସେମାନେ ରାସ୍ତାକଡ଼ରେ ଗାଡି ରଖିବାକୁ ବାଧ୍ୟ ହୋଇଥାନ୍ତି । ଏଭଳି ଅବ୍ୟବସ୍ଥା ଭିତରେ ଫଳ ବ୍ୟବସାୟ ·ଲୁଥିବା ବେଳେ ଆଜି ସନ୍ଧ୍ୟା ପ୍ରାୟ ୫ଟା ବେଳେ ଦୁର୍ଘଟଣା ଘଟିଥିଲା । ସାଲେପୁରରୁ କଟକ ଅଭିମୁଖେ ଆସୁଥିବା ଏକ ୧୪ ଚକିଆ ଟ୍ରକ ଦୃତ ବେଗରେ ଆସି ପାର୍କିଂ କରିଥିବା କାର ଓ ବାଇକ୍ ଉପରେ ଚଢାଇବା ସହ ଦୋକାନ ଭିତରକୁ ମାଡି ଯାଇଥିଲା । ଘଟଣାସ୍ଥଳରେ ପୁଲିସ୍ ପହଞ୍ଚି ଆହତଙ୍କୁ ଉଦ୍ଧାର କରି ମେଡିକାଲ୍ ପଠାଇଥିବା ବେଳେ ଦୁର୍ଘଟଣାଗ୍ରସ୍ତ ୮ଗୋଟି ଗାଡ଼ିକୁ ଜବତ କରିଛି । ଟ୍ରକ୍ ଡ୍ରାଇଭରକୁ ପୁଲିସ୍ ଥାନାରେ ଅଟକ ରଖି ପଚରାଉଚରା କରିବା ବେଳେ ସେ ଗୁଜରପୁର ନିକଟରେ ଜଣେ ବ୍ୟକ୍ତିକୁ ଧକ୍କା ଦେଇ ଖସି ପଳାଉ ଥିବା ବେଳେ ଏଭଳି ଦୁର୍ଘଟଣା ଘଟିଥିବା ସେ ସ୍ୱୀକାର କରିଛି ।
About Author
