ବାଲିଗୁଆଳିରେ ତାଲିବାନୀ ବର୍ବରତା
ଦିବ୍ୟାଙ୍ଗଙ୍କୁ ମାଡ଼ ମାରିବା ଭିଡିଓ ଭାଇରାଲ୍
ପୁରୀ (ବୁ୍ୟରୋ): ଉଭୟ କେନ୍ଦ୍ର ଓ ରାଜ୍ୟ ସରକାର ଦିବ୍ୟାଙ୍ଗଙ୍କ ଲାଗି ସ୍ୱତନ୍ତ୍ର ସ୍ଥାନ ସଂରକ୍ଷିତ ରଖିଛନ୍ତି । ଏପରିକି ସେମାନଙ୍କୁ ସମ୍ମାନ ଦେବା ଲାଗି ବ୍ୟବସ୍ଥା କରାଯାଇଛି । ସେମାନଙ୍କୁ ସମସ୍ତେ ସହୟତାର ହାତ ବଢ଼ାଇବାକୁ କୁହାଯାଇଛି । ଏଭଳି ସ୍ଥଳେ ବାଲିଗୁଆଳି ଅଞ୍ଚଳରେ ତାଲିବାନୀ ବର୍ବରତା ଦେଖିବାକୁ ମିଳିଛି । ଜଣେ ଦିବ୍ୟାଙ୍ଗ ଯୁବକକୁ ଅତ୍ୟନ୍ତ ଅମାନୁଷିକ ଭାବେ ଗୋଡ଼ାଇ ଗୋଡ଼ାଇ ମାଡ଼ ମାରି ମୁଣ୍ଡ ଫଟାଇବା ଘଟଣା ପୁରୀ ସହରରେ ଆଲୋଡ଼ନ ସୃଷ୍ଟି କରିଛି । ଏପରିକି ଏହି ଘଟଣାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଲାଣି । ଏହା ଦେଖି ଦିବ୍ୟାଙ୍ଗଙ୍କ ପ୍ରତି ଆକ୍ରମଣ ଘଟଣାକୁ ବିରୋଧ କରିବା ସହ ତୁରନ୍ତ ମାଡ଼ ମାରିଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭିନ୍ନ ମହଲରେ ଦାବି ଜୋର୍ ଧରିଛି ।
ଅନ୍ୟପକ୍ଷରେ ଘଟଣାକୁ କିଛି ଘଣ୍ଟା ବିତିଯାଇଥିଲେ ସୁଦ୍ଧା ପୁଲିସ ଚୁପ୍ ବସି ରହିବା ସମସ୍ତଙ୍କୁ ଚକିତ କରିଛି । ତେବେ କେବେ ପୁଲିସ ଅଭିଯୁକ୍ତକୁ ଗିରଫ କରୁଛି ତାହା ଉପରେ ସମସ୍ତଙ୍କ ନଜର ।
ସୂଚନାଯୋଗ୍ୟ, ସ୍ଥାନୀୟ ପେଣ୍ଠକଟା ମେରାଇନ୍ ଥାନା ଅନ୍ତର୍ଗତ ବାଲିଗୁଆଳି ଗ୍ରାମର ଦିବ୍ୟାଙ୍ଗ ଯୁବକ ସୌମ୍ୟରଞ୍ଜନ ପ୍ରଧାନ । ସୌମ୍ୟ ପିଲାବେଳୁ କଥା କହିପାରୁ ନାହାନ୍ତି କି ଶୁଣିପାରୁ ନାହାନ୍ତି । କିନ୍ତୁ ଠାର ମାଧ୍ୟମରେ କିଛି ଜାଣନ୍ତି । ସେ ସାଇକେଲ୍ରେ ଯାଉଥିବା ବେଳେ ଅନ୍ୟ ଜଣେ ଯୁବକ ବାଇକ୍ରେ ଯାଉଥିଲେ । ସେଭଳି କିଛି ଘଟଣା ନ ଥିବାବେଳେ ହଠାତ୍ ବାଇକ୍ ଚାଳକ ଆସି ଦିବ୍ୟାଙ୍ଗ ଯୁବକକୁ ନିସ୍ତୁକ ମାଡ଼ ମାରିଥିଲା । ଏପରିକି ତାକୁ ଗୋଡ଼ାଇ ଗୋଡ଼ାଇ ମାଡ ମାରୁଥିବା ଦୃଶ୍ୟର ଭିଡିଓ ଭାଇରାଲ ହେଉଛି । ଏପରିକି ଦିବ୍ୟାଙ୍ଗର ମୁଣ୍ଡ ଫାଟିଥିଲେ ସୁଦ୍ଧା ଆକ୍ରମଣକାରୀ ଛାଡୁ ନ ଥିବା ଜଣାପଡ଼ିଛି । ଏଭଳି ଘଟଣା ନେଇ ଥାନାରେ ଅଭିଯୋଗ ହୋଇଥିଲେ ସୁଦ୍ଧା ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନାହିଁ । ଏନେଇ ପୁଲିସ ୧୧୨/୨୨ରେ କେବଳ ମାମଲା ରୁଜୁ କରିଛି ।
About Author
