ଜୁଆ ଆଡ୍ଡାରେ ଚଢ଼ଉ: ୧ଠ ଗିରଫ, ୪.୨୫ ଲକ୍ଷ ଜବତ
କୁକୁଡ଼ାଖଣ୍ଡି (ଆପ୍ର): ସଦର ଥାନା ଅଧୀନ ସହରତଳି ଅଞ୍ଚଳ ଖାରବେଳନଗର ତୃତୀୟ ଲେନ୍ରେ ଚାଲିଥିବା ଏକ ଜୁଆ ଆଡ୍ଡା ଉପରେ ଚଢ଼ଉ କରି ପୁଲିସ ୧୦ ଜୁଆଡ଼ିଙ୍କୁ ଗିରଫ କରିବା ସହ ତାଙ୍କଠାରୁ ନଗଦ ୪ଲକ୍ଷ ୨୫ହଜାର ୨୭୦ ଟଙ୍କା ଜବତ କରିଛି । ସଦର ଥାନା ପୁଲିସ ଟିମ ସହ ନିମଖଣ୍ଡି ଫାଣ୍ଡି ପୁଲିସଙ୍କୁ ନେଇ ଏକ ସ୍ୱତନ୍ତ୍ର ସ୍କ୍ୱର୍ଡ ଗଠନ କରି ଚଢ଼ଉ କରିଥିଲେ । ସଦର ଏସ୍ଡିପିଓ ଶିବ ଶଙ୍କର ମହାପାତ୍ର, ଥାନା ଅଧିକାରୀ ମହେନ୍ଦ୍ର କୁମାର ସାହୁଙ୍କ ନେତୃତ୍ୱରେ ସଦର ଥାନା ପୁଲିସ ସହ ନିମଖଣ୍ଡି ଫାଣ୍ଡି ଅଧିକାରୀ ଜ୍ୟୋତି ରଞ୍ଜନ ବେହେରା ଛଦ୍ମ ବେଶରେ ଉକ୍ତ ଜୁଆ ଆଡ୍ଡା ଉପରେ ଚଢ଼ଉ କରିଥିଲେ । ଚଢ଼ାଉ ବେଳେ ନଗଦ ଟଙ୍କା ସମେତ ୧୧ଟି ମୋବାଇଲ, ୩ଟି ମୋଟର ସାଇକେଲ ସହ ତାସକାଟା ଜବତ ହୋଇଛି । କେତେକ ଜୁଆଡ଼ି ବଡ଼ ବଜାର ଅଞ୍ଚଳର ବ୍ୟବସାୟୀ ହୋଇଥିବା ପୁଲିସ କହିଛି । ଅଭିଯୁକ୍ତମାନଙ୍କୁ କୋର୍ଟଚାଲାଣ କରାଯାଇଥିବା ଥାନା ଅଧିକାରୀ ମହେନ୍ଦ୍ର କୁମାର ସାହୁ ସୂଚନା ଦେଇଛନ୍ତି ।
About Author
