ଶୀର୍ଷରେ ୭ ପଏଣ୍ଟ ଆଗରେ ଭାରତ
ଆଇସିସି ଟି-୨୦ ମାନ୍ୟତା
ଦୁବାଇ, ୨୬ା୯ (ଏଜେନ୍ସି): ଅଷ୍ଟ୍ରେଲିଆ ବିପକ୍ଷରେ ଶୃଙ୍ଖଳା ଜିତିବା ପରେ ଟିମ୍ ଇଣ୍ଡିଆ ସଦ୍ୟତମ ଆଇସିସି ଟି-୨୦ ମାନ୍ୟତାର ଶୀର୍ଷ ସ୍ଥାନରେ ଇଂଲଣ୍ଡ ଠାରୁ ୭ ପଏଣ୍ଟ ଆଗରେ ରହିଛି ।
ଅଷ୍ଟ୍ରେଲିଆ ବିପକ୍ଷରେ ୦-୧ରେ ପଛରେ ଥାଇ ରୋହିତ ଶର୍ମାଙ୍କ ନେତୃତ୍ୱାଧୀନ ଟିମ୍ ନାଗପୁର ଠାରେ ପ୍ରତ୍ୟାବର୍ତ୍ତନ କରି ଶୃଙ୍ଖଳାକୁ ସମାନ ସ୍ଥିତିକୁ ଆଣିଥିଲା । ଏହାପରେ ରବିବାର ହାଇଦରାବାଦ ଠାରେ ବିରାଟ କୋହଲି ଓ ସୂର୍ଯ୍ୟକୁମାର ଯାଦବ ଅର୍ଦ୍ଧଶତକୀୟ ଇନିଂସ୍ ଖେଳି ଭାରତକୁ ୨-୧ରେ ଜିତାଇଥିଲେ । ଏହି ବିଜୟ ଫଳରେ ଭାରତର ର୍ୟାଙ୍କିଙ୍ଗ୍ରେ ଗୋଟିଏ ପଏଣ୍ଟ ବଢ଼ି ୨୬୮ରେ ପହଞ୍ଚିଛି ।
ଦକ୍ଷିଣ ଆଫ୍ରିକା ବିପକ୍ଷ ଆଗାମୀ ତିନି-ମ୍ୟାଚ୍ର ଶୃଙ୍ଖଳା ଟି-୨୦ ବିଶ୍ୱକପ୍ ପୂର୍ବରୁ ଭାରତକୁ ଶୀର୍ଷ ସ୍ଥାନରେ ନିଜ ସ୍ଥିତି ମଜଭୁତ କରିବାକୁ ସୁଯୋଗ ଦେବ । ଦକ୍ଷିଣ ଆଫ୍ରିକା ୨୫୮ ପଏଣ୍ଟ ସହ ତୃତୀୟ ସ୍ଥାନରେ ରହିଛି ।
ପାକିସ୍ତାନ ଏବେ ଦକ୍ଷିଣ ଆଫ୍ରିକା ସହ ସମାନ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି । ତେବେ ଇଂଲଣ୍ଡ ବିପକ୍ଷ ଶେଷ ତିନିଟି ମ୍ୟାଚ୍ ଜିତିଲେ ଟିମ୍ ଦ୍ୱିତୀୟ ସ୍ଥାନରେ ପହଞ୍ଚିପାରିବ । ଅନ୍ୟପଟେ ଇଂଲଣ୍ଡ ଦ୍ୱିତୀୟ ସ୍ଥାନରେ ସ୍ଥିର ରହିଛି । ଶୃଙ୍ଖଳା ଏବେ ୨-୨ ସ୍ଥିତିରେ ରହିଛି ।
ବିଶ୍ୱ ବିଜେତା ଅଷ୍ଟ୍ରେଲିଆ ଷଷ୍ଠ ସ୍ଥାନରେ ରହିଛି । ଭାରତ ଠାରୁ ଶୃଙ୍ଖଳା ପରାଜୟ ପରେ କଙ୍ଗାରୁ ଟିମ୍ ଗୋଟିଏ ପଏଣ୍ଟ ହରାଇ ୨୫୦କୁ ଖସିଆସିଛି ।
About Author
