ଭିଆଇପିଙ୍କ ସନ୍ତାନ ସମେତ ୧୪୨ ଅଟକ
ହାଇଦ୍ରାବାଦ ରାବ୍ ପାର୍ଟି
ନୂଆଦିଲ୍ଲୀ, ୩ା୪: ମୁମ୍ବାଇ ରାବ୍ ପାର୍ଟିର ୬ ମାସ ପରେ ହାଇଦ୍ରାବାଦର ଏକ ପଞ୍ଚତାରକା ହୋଟେଲରେ ଚାଲିଥିବା ଆଉ ଏକ ବଡ଼ଧରଣର ରାବ୍ ପାର୍ଟି ଉପରେ ଚଢ଼ାଉ କରାଯାଇଛି । ରବିବାର ପ୍ରତୁ୍ୟଷରେ ହାଇଦ୍ରାବାଦ ପୁଲିସ୍ର ସ୍ୱତନ୍ତ୍ର ଟାସ୍କଫୋର୍ସ ବଞ୍ଜାରା ହିଲ୍ସସ୍ଥିତ ରାଡିସନ୍ ବ୍ଲୁ-ହୋଟେଲରେ ଚଢ଼ାଉ କରି ବହୁ ଭିଆଇପି, ଅଭିନେତା, ରାଜନେତାଙ୍କ ପୁଅଙ୍କ ସମେତ ୧୪୨ ଜଣଙ୍କୁ ଅଟକ ରଖିଛନ୍ତି । ଏଥିସହିତ କର୍ତ୍ତବ୍ୟରେ ଅବହେଳା ପାଇଁ ବଞ୍ଜାରା ହିଲ୍ସ ଏସ୍ଏଚ୍ଓ ଶିବଚରଣଙ୍କୁ ସସ୍ପେଣ୍ଡ କରାଯାଇଛି ।
ଅଟକ ଥିବା ଲୋକମାନଙ୍କ ନିକଟରୁ କୋକେନ୍, ଚରସ ଭଳି ବେଆଇନ ନିଶାଦ୍ରବ୍ୟ ଜବତ କରାଯାଇଛି । ଅଭିନେତା ନାଗାବାବୁଙ୍କ କନ୍ୟା ନିହାରିକା କୋନିଡେଲା ଅନ୍ତର୍ଭୁକ୍ତ । ସେ ମଧ୍ୟ ଦକ୍ଷିଣୀ ମେଗାଷ୍ଟାର ଚିରଞ୍ଜିବୀଙ୍କ ସମ୍ପର୍କୀୟ ତେଲୁଗୁ ରିଅଲିଟି ସୋ’ ବିଗ୍ବସ୍ର ତୃତୀୟ ସିଜିନ୍ ବିଜେତା ତଥା ଗାୟକ ରାହୁଲ ଶିଳ୍ପୀଗଞ୍ଜ, ତେଲୁଗୁଦେଶମ ପାର୍ଟିର ସାଂସଦଙ୍କ ପୁଅ, ତେଲେଙ୍ଗାନା କଂଗ୍ରେସ ନେତା ଅଞ୍ଜନ କୁମାର ଯାଦବଙ୍କ ପୁଅଙ୍କୁ ମଧ୍ୟ ଅଟକ ରଖାଯାଇଛି । ତେବେ ଶ୍ରୀ ଯାଦବ କୌଣସି ବେଆଇନ ନିଶାଦ୍ରବ୍ୟ ସେବନରେ ଜଡ଼ିତ ନ ଥିବା ସଫେଇ ଦେଇଛନ୍ତି । ଏହି ହୋଟେଲ ମାଲିକ ହେଉଛନ୍ତି ଆନ୍ଧ୍ରର ଜଣେ ପୂର୍ବତନ ସାଂସଦଙ୍କ କନ୍ୟା । ନିକଟରେ ଜଣେ ଇଞ୍ଜିନିୟରିଂ ଛାତ୍ର ଡ୍ରଗ୍ସ ସେବନ କରି ପ୍ରାଣ ହରାଇବା ପରେ ହାଇଦ୍ରାବାଦ ନାର୍କୋଟିକ୍ ଏନ୍ଫୋର୍ସମେଣ୍ଟ ୱିଙ୍ଗ୍ ପକ୍ଷରୁ ରାଜ୍ୟବ୍ୟାପୀ ଚଢ଼ାଉ ଜାରି ରହିଛି ।
About Author
